Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 431 Hüküm no: 715 Orijinal metin no: [70b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Neccar kalfası Manol v. Panço’nun neccarlık ücretinden alacağı olduğu iddiasıyla Memiş Beşe aleyhine açtığı davada elli guruşa sulh olduğu Sâdır olunan fermân-ı âlîlerine imtisâlen Galata Bâb Mahkemesi’nden mürsel müderrisîn-i kirâmdan Kâtib es-Seyyid Abdülfettâh Efendi dâ‘îleri hâssa mi‘mâran[ından es-Seyyid] Mustafa ve es-Seyyid Mehmed Said halîfeler ile Galata’da Sultan Bayezid Mahallesi’nde vâki‘ birbirine muttasıl münâza‘un-fîhâ olan üç bâb menâzile varıp huzûr-ı Müslimînde akd-i meclis-i şer‘-i ettikde sâhib-i arzuhâl neccâr kalfalarından Manol v. Panço nâm zimmî meclis-i ma‘kūd-ı mezkûrda menâzil-i mezkûrenin mutasarrıfı derûn-ı arzuhâlde mezkûrü’l-ism Memiş Beşe muvâcehesinde menâzil-i mezkûre bundan akdem vukū‘ bulan harîkde muhterik oldukda arsa-yı sırfa kaldıkdan sonra mutasarrıfı mezbûr Memiş Beşe arsa-yı mezkûre üzerine işbu mu‘âyene olunan vech üzere üç bâb menâzil binâ ve inşâ eyledikde ebniye-i mezkûrenin ücret-i neccâriyesine bi-şartü’r-rücû‘ mezbûr Memiş Beşe’nin emriyle mâlımdan masrûfum olan sekiz yüz elli iki guruşun yedi yüz elli guruşunu mezbûrun yedinden ahz u kabz edip bâkī yüz iki guruşu bana vermemekle bi’l-mürâca‘a taleb ederim deyü tasaddî eylediğim da‘vâmdan bâ tavassut-i muslihîn mezbûr Memiş Beşe ile elli guruş bedel-i makbûza ba‘de’s-sulh ve’l-kabûl mâ‘adâya ve bedel-i sulh-ı mezkûra müte‘allika âmme-i da‘vâdan herbirimiz âharın zimmetini ibrâ ve iskāt ve herbirimiz ber-vech-i muharrer âharın ibrâsını kabûl-birle kat‘-ı nizâ‘ eyledik deyü ikrâr ve tasdîklerin mezbûr dâ‘îleri mahallinde tahrîr ve ma’an meb‘ûs ümenâ-i şer‘ ile meclis-i şer‘a gelip alâ-vukū‘ihi inhâ eyledikleri tescîl ve mübâşirleri Ases Ali Çavuş kulları yediyle huzûr-ı âlîlerine i‘lâm olundu. Fî 28 Ra sene [1]222.