Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 432 Hüküm no: 716 Orijinal metin no: [70b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirkor v. Abraham’ın ferağ etdiği vakıf menzilin bedelini ödemediği iddiasıyla Hanna v. Batavesna aleyhine açtığı alacak davasının Haremeyn müfettişine havale olunduğu El-hamdü li’llâhi ellezî serre’l-encâm Nemekahü’l-fakīru ileyh azze şânühu Şeyhzâde Hasan el-müvellâ-hilâfeten bi-Galata el-mahrûse Gufire lehümâ [mühür] Hasan Kirkor v. Abraham zimmî Galata’da mahfil-i kazâda tüccârdan Hanna v. Batavesna muvâcehesinde Dârü’s-sa‘âdeti’ş-şerîfe ağası hazretlerinin nezâretlerinde âsûde evkāfdan Haremeyn-i Muhteremeyn Vakfı müsakkafâtından mahrûse-i Galata hâricinde Şeyhü’l-harem Hüseyin Ağa Mahallesi’nde vâki‘ hudûd ve müştemilâtı beynimizde ma‘lûm bi’l-icâreteyn tasarrufumda olan bir bâb vakıf menzilimi yüz doksan guruş bedel-i müsemmâ mukābelesinde bâ-re’y-i mütevellî mersûm Nasrânî’ye ferağ ve teslîm ve tefvîz eylediğimde ol dahi ba‘de’l-kabz ve’t-tesellüm bedel-i merkūmu bana vermemekle hâlâ taleb ederim deyü tasaddî eylediği da‘vâsı takrîr-i meşrûhu üzere nezâret-i aliyye-i hazret-i müşârun-ileyhde âsûde Haremeyn-i Muhteremeyn Vakfı müstegallâtından olmağla bu misillü evkāf-ı şerîfede vâki‘ olan da‘vânın mütevellî-i vakf hâzır olduğu hâlde Haremeyni’ş-Şerîfeyn müfettişi efendi dâ‘îleri huzûrunda fasl [u] hasm olunmak iktizâ eylediği ba‘de’t-[tefhîm] ol vechile da‘vâları istimâ‘ olunmadığı bi’l-iltimâs huzûr-ı âlîlerine i‘lâm olundu. Fî 29 Ra sene 1222.