Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 433 Hüküm no: 717 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rakkas Ustası Çolak Vasil’in sulh bedelinden alacağı olan beş yüz kırk yedi buçuk guruşu taksitle ödemesi için Rakkas Yorgi’ye izin verdiği Galata’da mütemekkin rakkās ustalarından Çolak Vasil v. Luka zimmî Galata’da mahfil-i kazâda Rakkās Yorgi v. Kirkor zimmî muvâcehesinde mersûm Yorgi zimmî zimmetinde cihet-i karzdan dokuz yüz guruş ve bi-şartü’r-rücû‘ emriyle zâbıtâna mâlımdan def‘ ve teslîm eylediğim sekiz yüz guruş ve ma‘lûmü’l-esâmî kimesnelere semen-i mebî‘den deyni olup kezâlik bi-şartü’r-rücû‘ emriyle def‘ u teslîm eylediğim beş yüz yetmiş guruş ki cem‘an iki bin beş yüz elli guruş alacak hakkım olmağla hâlâ taleb ederim deyü tasaddî eylediğim da‘vâ-yı mezkûremden bâ-tavassut-ı muslihîn mersûm Yorgi zimmî ile bin altı yüz guruşa sulh olduğumda ol dahi sulh-ı mezkûru ba‘de’l-kabûl bedel-i sulh-ı merkūm bin altı yüz guruşun bin elli iki buçuk guruşunu bana def‘ u teslîm bâkī beş yüz kırk yedi buçuk guruşunu hâlâ ve def‘aten bana edâya iktidârı olmayıp ber-vech-i câ’î tecîle tâlib olmağla ben dahi beher şehr yirmişer guruş verip târih-i i‘lâmdan yirmi yedi ay on beş gün tamamına değin tamamen edâ-yı deyn etmek üzere medyûnum mersûm Yorgi zimmîyi rızâmla te’cîl ve taksît eylediğimde ol dahi müeccelen ve mukassatan edâya ta‘ahhüd eyledi deyü mukırr-ı mersûm Çolak Vasil zimmîyi bi’l-cümle kelimât-ı meşrûhasında tasdîk eylediği tescîl ve mübâşirleri Ali Çavuş kulları yediyle bi’l-iltimâs [huzûr-ı âlîlerine i‘lâm olundu.] Fî 27 Ra sene [1]222.