Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 43 Hüküm no: 1 Orijinal metin no: [1-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Oğluna ait olup el koyduğu akçeyi Mustafa Paşa’nın küçük oğlu Mehmed’in vasîsine iadesi Medîne-i Hazret-i Ebî Eyyûb el-Ensârî -radıye anhü Rabbühü’l-Bârî- muzâfâtından Hasköy mahallâtından el-Hâc Şaban mahallesi sâkinlerinden olup bundan akdem müteveffât olan İsmihan bt. Mehmed’in sagīr oğlu Mehmed b. Mustafa nâm sagīre kıbel-i şer‘-i kavîmden vasî-i mansûbu olan ceddesi Nesli Hatun bt. Abdullah meclis-i şer‘-i hatîr-i lâzımü’t-tevkīrde sagīr-i mezbûrun babası Mustafa Paşa b. Abdullah muvâcehesinde takrîr-i kelâm ve ta‘bîr ani’l-merâm edüp vasîsi olduğum Mehmed’in babası mezkûr Mustafa Paşa mezbûr Mehmed’in kendi ulûfesinden kırk beş akçesin ve bir çukasın almışdır. [Ve]sâyetim hasebiyle mezbûr Mustafa Paşa’dan taleb ederin. Vâki‘ hâl mezbûr Mustafa Paşa’dan suâl olunup sagīr-i mezbûrun hakkı alıverilmesin taleb ederim dedikde gıbbe’s-suâl mezbûr Mustafa Paşa fi’l-vâki‘ sagīr-i mezbûr Mehmed’in kendi ulûfesinden kırk beş akçesin ve bir çukasın ahz eyledim lâkin mezbûre Nesli Hatun benim huzûrumda vasî olmamışdır deyü cevâb vericek zikrolunan kırk beş akçe ve çuka ki mezbûr Mustafa Paşa ahz eylemiş idi mezbûre Nesli Hatun’a teslîme tenbîh birle bu hurûf ketb ve terkīm olunup sûreti tâlibe Nesli yedine vaz‘ ve def‘ olundu ki vakt-i hâcette ihticâc edine. Cerâ zâlike ve hurrire fi’l-yevmi’l-âşir fî-şehr-i Zilka‘deti’ş-şerîfe min-şuhûr-i sene selâse ve işrîn ve elf. Şuhûd[ü’l-hâl]: Bahaeddin b. Hüseyin, Cafer b. Abdullah, Receb b. Abdullah, Cafer b. Muharrem, Mehmed b. Mustafa