Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 43 Hüküm no: 3 Orijinal metin no: [2-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emîrza Bey’in Ali b. Mustafa’daki alacak davasında sulh oldukları Vilâyet-i Anadolu’da Karaman Sancağı’ndan Kırili kazâsına tâbi‘ Selkisaray nâm karye sâkinlerinden olup zümre-i sipâhiyândan olan Emîrza Bey b. Bali nâm kimesne meclis-i şer‘-i hatîr-i lâzımü’t-tevkīrde bundan akdem karye-i mezbûreden olup hâlen Hazret-i Ebî Eyyûb el-Ensârî -radıye anhü Rabbühü’l-Bârî-’ye tâbi‘ Hasköy’de Abdüsselam mahallesinde tevattun eden Ali b. Mustafa nâm kimesne muvâcehesinde takrîr-i kelâm ve ta‘bîr ani’l-merâm edüp mezbûr Ali’ye karz beş bin akçe verdim. Vâki‘ hâl mezbûr Ali’den suâl olunup hakkımız alıverilmesin taleb ederin dedikde gıbbe’s-suâl mezbûr Ali inkâr birle cevâb verip müdde‘î-i mezbûr Emîrza Bey’den sıdk-ı da‘vâsına mutâbık beyyine taleb olunup ityân-ı beyyine sadedinde iken muslihûn tavassut edüp es-sulhü seyyidü’l-ahkâm fehvâsı üzre mâ-beynimiz sekiz yüz akçeye ıslâh edüp bedel-i sulh olan sekiz yüz akçeyi mezbûr Ali yedinden ahz u kabz eyledim. Ba‘de’l-yevm benim cânibimden eğer asâleten ve vekâleten bu husûsa müte‘allik da‘vâ sâdır olursa lede’l-hükkâmi’l-kirâm mesmû‘a ve makbûle olmayıp telbîs ve tezvîre mahmûle ola dedikde mukırr-ı mezbûr Emîrza Bey’in vech-i meşrûh üzre sâdır olan ikrâ[rı]nı el-mukarru lehu’l-merkūm Ali, vicâhen ve şifâhen tasdîk ve tahkīk eyledikde bu hurûf ketb ü terkīm olunup sûreti tâlibi yedine vaz‘ ü def‘ olundu ki, vakt-i hâcette ihticâc edine. Cerâ zâlike ve hurrire fi’l-yevmi’s-sâmin min-şehr-i Zilka‘deti’l-harâm min-şuhûr-i sene selâse ve işrîn ve elf. Şuhûdü’l-hâl: Mustafa Bey b. Hasan, Murad Bey b. Abdullah, Bekir Çelebi b. Cafer, Müstedam Bey b. Abdullah, Hasan b. Mehmed, Bahaeddin [b.] Hüseyin, İbrâhim b. Davud, Mustafa Bey [b.] Kaya, Kenan Çavuş [b.] Keyvan Sahh.