Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 44 Hüküm no: 5 Orijinal metin no: [3-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Ali’nin kayığına sahipsiz diye el koyan Mehmed Subaşı’nın kayığı iade etmesi Mahrûse-i Kostantıniyye’de Papasoğlu Medrese[sinde] sâkin Hasan b. Ali nâm kimesne meclis-i şer‘-i şerîf-i lâzımü’t-tevkīrde hazır olup havâss-ı Kostantıniyye tevâbi‘inden hâlen Hasköy subaşısı mahzarında takrîr-i da‘vâ edüp Pîrî Paşa mahallesine karîb Kiremidlik nâm mevzi‘de bundan akdem üç ay vardır Üsküdar kayığı tarzında bir kayık komuşdum hâlen mezbûr Mehmed Subaşı zabteylemiş. Keyfiyet-i ahvâl suâl olunup icrâ-yı hak olunmak taleb ederin dedikde gıbbe’s-suâl mezkûr Mehmed Subaşı bi’l-muvâcehe cevâb verip mezkûrun iddi‘â eylediği kayığın sahibi nâ-ma‘lûm olmağın zabteyledim deyicek müdde‘î-i mezkûr Hasan’ın sıdk-ı da‘vâsına mutâbık beyyine taleb olundukda udûlden Mehmed b. Durmuş ve Ahmed b. Turgud nâm kimesneler meclis-i şer‘a li-ecli’ş-şehâde hâzırân olup ve edâ’-i şehâdet-i şer‘iye edüp dediler ki, mezkûr Hasan’ın iddi‘â eylediği kayık kendinin mülküdür. Âharın alâkası yokdur şâhidiz. Şehâdet dahi ederiz dediklerinde şehâdetleri hayyiz-i kabûlde vâki‘ oldukdan sonra mezbûr Mehmed Subaşı’ya kayığın teslîmi içün tenbîh olunup hâzihi’l-hurûf kayd şüd. Fî-evâil-i şehr-i Muharremi’l-harâm sene 1024. Şuhûdü’l-hâl: Mehmed b. Mustafa el-Muhzır ve Receb b. Abdullah el-Muhzır ve Sefer b. Hüseyin ve Süleyman Efendi b. Ahmed Efendi ve gayruhum