Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 45 Hüküm no: 6 Orijinal metin no: [3-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ramazan b. Abdullah ile Mülayime isimli hatunun şarap içerken yakalanması Oldur ki, havâss-ı Kostantıniyye tevâbi‘inden bi’l-fi‘il Hasköy zâbiti olan Hasan Şu[r]bacı ve subaşısı Mehmed Bey, Ramazan b. Abdullah nâm kimesne ile Mülâyime nâm nâ-mahrem hatunu meclis-i şer‘-i şerîf-i lâzımü’t-tevkīre ihzâr edüp ve üzerlerine takrîr-i kelâm edüp dediler ki, mezbûr Ramazan serhoş ve mezbûre Mülâyime’nin elinde desti ile hamr ve bir makrame ile esbâb bizim ile havâss-ı mezbûra tâbi‘ Pîrîpaşa mahallesine karîb Kiremidlik nâm mevzi‘den alâniyeten (…) mu‘âmele ederler iken ahz eyledim. Keyfiyet-i hâl, mezbûrândan suâl olunub (…) mezbûr Ramazan’a mezkûre Mülâyime senin nendir deyü suâl olundukda nikâh ile (…) ve hâlen mahalle-i mezbûrede şurb-i hamr eylemeğe giderdik. Mezbûr Mehmed Bey bizi ahz [4] eyledi deyü ikrâr idücek mezbûre Mülâyime dahi mezbûr Ramazan’ın kavlini tasdîk edüp mâ hüve’l-vâki‘ alâ-vukū‘ihî mezbûrân Hasan Şu[r]bacı ve Mehmed Bey talebleri ile ketb olunup yedlerine def‘ olundu ki, vakt-i hâcette müzekkir-i mâ cerâ ola. Tahrîren fî 12 şehr-i Muharremi’l-harâm sene erba‘a ve işrîn ve elf. Şuhûdü’l-hâl: Piyale Bey b. Abdullah ve Mehmed Efendi b. Ahmed ve Mehmed b. Mustafa el-muhtesib ve Receb b. Abdullah ve Şaban b. Nasuh ve Davud b. Osman ve gayruhum mine’l-hâzırîn