Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 45 Hüküm no: 7 Orijinal metin no: [4-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Abdullah’ın Piyale Bey b. Abdullah’ı vekil tayin etmesi Vech-i tahrîr-i hurûf budur ki, medîne-i Hazret-i Ebî Eyyûb el-Ensârî -radıye anhü Rabbühü’l-Bârî- muzâfâtından Hasköy mahallâtından mahalle-i Abdüsselam’dan Hasan b. Abdullah meclis-i şer‘-i şerîf-i lâzımü’t-teşrîfde karye-i mezbûreye tâbi‘ Südlüce nâm mevzi‘de Mahmud Ağa Câmi‘i mahallesinde sâkin Piyale Bey b. Abdullah muvâcehesinde takrîr-i kelâm ve ta‘bîr ani’l-merâm kılıp üvey kızım Mümine ile bundan akdem fevt olan zevcem Emine’den irs-i şer‘le bana intikāl eden eşyâyı da‘vâ ve talebe adem-i iktidâ[rı]m olduğu ecilden işbu hâfız-ı hâze’l-kitâb merkūm Piyale Bey’i mezbûre Mümine ile meclis-i şer‘de da‘vâ ve talebe ve kabz ve îsâle kendi cânibimden vekîlim olup husûs-ı mezbûra müte‘allik olan da‘vâmı bi-hasebi’ş-şer‘i’ş-şerîf görsün dedikde merkūm Piyale Bey dahi vekâlet-i mezbûreyi kabûl ve lâzım gelen da‘vâyı görmeğe müte‘ahhid oldukdan sonra hâzihi’l-hurûf li-ecli’t-temessük ketb olunup yed-i tâlibe vaz‘ ve def‘ olundu ki, vakt-i hâcette müzekkir-i mâ cerâ ola. Tahrîren fî-evâil-i şehr-i Muharremi’l-harâm li-sene erba‘a ve işrîn ve elf. Şuhûdü’l-hâl: Mehmed Efendi b. Ahmed Efendi ve Mehmed b. Mustafa ve Mehmed Paşa b. Abdullah ve Receb b. Abdullah ve Sefer b. Hüseyin Paşa ve gayruhum