Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 46 Hüküm no: 8 Orijinal metin no: [4-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Abdullah’ın Saliha bt. Abdullah’ı boşaması Sebeb-i tahrîr-i kitâb-ı şer‘î oldur ki, Medîne-i Hazret-i Ebî Eyyûb el-Ensârî -radıye anhü Rabbühü’l-Bârî-’ye tâbi‘ Has[köy] nâm karye mahallâtından Turşucu mahallesi sâkinlerinden Hasan b. Abdullah mahfil-i kazâda zevcesi Sâliha bt. Abdullah muvâcehesinde takrîr-i kelâm ve ta‘bîr ani’l-merâm kılıp mezbûre Sâliha’ya üç yüz akçe mehr-i müeccelini verip ve sâir nafaka-i iddetinden ve zevciyete müte‘allik benim ile olan da‘vâsından ferâgat edüp ve ben dahi talâk-ı bâyin ile talâk verdim ve birbirimizin zimmetini husûs-ı mezbûra müte‘allik cemî‘ da‘vâdan ferâğat edüp kat‘-ı alâka etdik. Min-ba‘d birbirimiz ile da‘vâ ve nizâ‘ımız kalmadı dedikde mezbûre Sâliha dahi mukırr-ı merkūmu ikrâr-ı meşrûhunda tasdîk edicek mâ hüve’l-vâki‘ alâ-vukū‘ihî mûmâ-ileyh Hasan talebiyle ketb olundu. Fî-evâil-i Muharrem sene 1024. Şu[hûdü’l-hâl]: Musa Efendi b. Mustafa el-Hatîb ve Mahmud b. Ali ve Sefer b. Şaban ve Ferhad b. Abdullah (…)