Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 46 Hüküm no: 9 Orijinal metin no: [5-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Efendisinden kaçan Sünbül isimli kölenin Hasköy subaşısına teslim edilmesi Budur ki, bi’l-fi‘il Hasköy Subaşı[sı] Mehmed Bey işbu hâfız-ı hâze’l-kitâb orta boylu açık kaşlı elâ gözlü ve iki gözünün ve kaşının ortasında dağ alâmetli Habeşiyyü’l-asl Sünbül b. Abdullah nâm abd-i âbıkı meclis-i şer‘-i şerîfe ihzâr ve üzerine takrîr-i kelâm edüp mevsûf Sünbül’ü karye-i mezbûreye tâbi‘ Südlüce nâm mevzi‘in bağçeleri kurbünde bostancılardan Bekir b. Abdullah ve Osman b. Abdullah nâm kimesneler ahz eylemişler keyfiyet-i ahvâl suâl olunsun deyicek gıbbe’s-suâl mezbûr Sünbül’ü ikrâr birle cevâb verip târih-i kitâbdan mukaddem bir yıldan mütecâvizdir Akhisar nâm kasabada Abdi nâm bir kimesnenin taht-ı tasarrufunda iken firâr edüp İstanbul’a dâhil olup Yahûdî Kapısı’nda bostancılar beni ahz edüp bostancıbaşına getirdiler. İlâ-hâze’l-ân onlara meccânen hızmet ederdim. Onlardan dahi firâr eyledim deyücek mezbûrun abd-i âbık idüğü mukarrer olup beher yevm beşer akçe nafaka takdîr olunup mûmâ-ileyh Mehmed Subaşı’ya teslîm olunup kazıyye alâ-vukū‘ihî kaydolundu. Hurrire fî-evâhir-i Muharrem sene 1024. Şuhûdü’l-hâl: Yusuf Paşa b. Abdullah ve Receb b. Abdullah ve Mehmed b. Mustafa ve Davud b. Mehmed ve gayruhum