Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 48 Hüküm no: 12 Orijinal metin no: [6-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ahmed Çelebi Evkāfı’na mütevellî tayini Nişân-ı şerîf-i âlîşân-ı sâmî-mekân-ı [sultânî] tuğrâ-yı garrâ-yı cihân[-sitân]-ı hâkānî [hükmü] oldur ki, Hazret-i Ebî Eyyûb Ensârî kazâsına tâbi‘ Hasköy’de merhûm Hacı Ahmed Çelebi Evkāfı’nın yevmî altı akçe ile tevliyeti evlâdına meşrûta iken hilâf-ı şart-ı vâkıf ecânibden Mustafa nâm kimesne bir tarîk ile berat ettirip def‘i lâzım olmağın def‘ olunup yerine işbu dârende-i fermân-ı hümâyûn Esadullah nâm kimesne[ye] ber-mûceb-i şart-ı vâkıf tevcîh olunmak bâbında inâyet recâ etmeğin sadaka edüp bu berat-ı hümâyûnu verdim ve buyurdum[ki] varup zikrolunan vakfa ber-mûceb-i meşrûtiyyet mütevellî olup hızmet-i lâzımesini müeddâ kıldıkdan sonra yevmî altı akçeye mutasarrıf olup vâkıfın rûhu ve benim devam-ı devletim içün du‘âya müdâvemet göstere. Şöyle bileler alâmet-i şerîfe i‘timâd kılalar. Tahrîren fi’l-yevmi’l-hâdî min-şehr-i Şevvali’l-mükerrem sene selâse ve işrîn ve elf. Be-makām-ı Kostantıniyye.