Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 52 Hüküm no: 25 Orijinal metin no: [9-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safracı Mustafa’nın Abdüllatif b. Carullah’ı evine gelirken yolunu kesip darb etmesi Hazret-i Ebî Eyyûb el-Ensârî -aleyhi’r-rahmeti’l-Bârî- sükkânından Abdüllatif b. Cârullah nâm kimesne yine Havâss-ı aliyye sâkinlerinden Safracı Mustafa nâm kimesneyi ihzâr ve muvâcehesinde takrîr-i kelâm ve ta‘bîr-i merâm kılıp dedi ki, mezbûr Safracı Mustafa ba‘de’l-asr evime giderken yoluma gelip bir asâ ile bana darb-ı şedîd ile darb etdi. Hâlen ol darbdan kâr [ü] kesbe ve harekete kādir değilim bi-hasebi’ş-şer‘i’ş-şerîf hakkımı taleb ederim dedikde gıbbe’s-suâl inkâr ile cevâb verdikde müdde‘î-i mezbûrdan da‘vâsına muvâfık ve kelâmına mutâbık beyyine taleb olundukda udûl-i Müslimînden Abdurrahmân b. Mahmud ve Ali [b.] Abdullah nâm kimesneler li-ecli’ş-şehâde el-hâzırân olup edâ-i şehâdet edüp dediler ki, mezkûr Safracı Mustafa, Abdullatîf’i bir asâ ile darb eylediğin biz hazır idik. Bu husûsa şâhidleriz şehâdet dahi ederiz dediklerinde şehâdetleri hayyiz-i kabûlde vâki‘ oldukda bi’t-taleb kaydolundu. Müzekkir-i mâ cerâ ola. Tahrîren fî-evsat-ı şehr-i Zilka‘deti’ş-şerîfe li-sene isneyn ve işrîn ve elf. Şuhûdü’l-hâl: Hasan b. Bekir el-mütevellî-i Bekir Çelebi, Mustafa b. …? ve Mehmed b. Bünyad ve gayruhum mine’l-hazırîn