Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 54 Hüküm no: 29 Orijinal metin no: [10-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âmine bt. Ali’nin Hasköy’de kendisine ait arsayı Hasan Çavuş b. Fazlullah’a satması Havâss-ı Kostantıniyye muzâfâtında Hasköy’de Ahmed Çelebi mahallesi sâkinelerinden Âmine bt. Ali nâm hatun tarafından Ahmed b. Cafer ve Mustafa b. Surûrî nâm kimesneler şehâdetleri ile vekâleti sâbit olan Murad b. Abdullah nâm kimesne meclis-i şer‘-i şerîfde işbu sahibü’l-kitâb fahrü’l-cüyûş Hasan Çavuş b. Fazlullah nâm kimesne mahzarında bi’t-tav‘ ve’r-rızâ’s-sâf ikrâr ve i‘tirâf edüp mezkûr Hasköy’de vâki‘ bir tarafı Râziye Hatun Vakfı’na ve bir tarafı Piyale Paşa Vakfı’na ve bir tarafı leb-i deryâ ve bir tarafı tarîk-ı âm ile mahdûd olan dört pereme yeri demek ile ma‘rûf arz-ı hâliyeyi vekâletim hasebiyle mezbûr Hasan Çavuş’a iki bin yüz râyic fi’l-vakt fıddî akçeye bey‘-ı bâtt-ı sahîh-i şer‘î ile bey‘ edüp kabz-ı semen-i ma‘dûd ve teslîm-i mebî‘-i mahdûd kıldım. Keyfe mâ yeşâ ve yahtâr mutasarrıf olsun dedikde mukırr-ı mezbûrun ikrâr-ı meşrûhunu el-mukarru lehu’l-merkūm Hasan Çavuş vicâhen tasdîk ve şifâhen tahkīk edicek mâ hüve’l-vâki‘ gıbbe’t-tasdîk ketb olundu. Hurrire fi’l-yevmi’s-sâlis aşer min-şehr-i Zilhicceti’ş-şerîfe li-sene isneyn ve işrîn ve elf. Şuhûdü’l-hâl: Mehmed b. Hasan, Mehmed b. Mustafa, Mahmud b. Hasan el-imâm, Ahmed b. Abdullah, Yusuf b. Abdullah, Receb b. Abdullah ve gayruhum [mine’l-hâzırîn]