Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 54 Hüküm no: 30 Orijinal metin no: [10-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gazanfer b. Safâ tarafından yaralanan Mehmed’in durumunun tarifi Hasköy sâkinlerinden Hasan b. Mehmed nâm kimesne meclis-i şer‘-i şerîfde takrîr-i kelâm edüp işbu mâh-ı Zilhiccesi’nin on birinci Çarşamba gecesi ba‘de’l-işâ’ Pîrîpaşa’da oğlum Mehmed’i Gazanfer b. Safâ nâm cingân sağ koltuğu altından bıçak ile urup mecrûh eylemişdir. Hâlen mecrûh yatar. Kıbel-i şer‘den keşfolunmak içün üzerine varılıp takrîri tahrîr olunmasın taleb ederin dedikde zeyl-i kitâbda mastûrü’l-esâmî olan Müslimânlar ile üzerine varılıp yarası keşfolundukda mezbûr Mehmed’in sağ koltuğu altında bıçak yarası olup cârihin kimdir deyü suâl olundukda beni Gazanfer bıçak ile sağ koltuğum altından urup mecrûh eyledi. Cârihim oldur deyü cevâb verdikde mezbûr Gazanfer’e suâl olundukda inkâr ile cevâb verip müdde‘î-i mezbûrdan sıdk-ı makāline mutâbık beyyine taleb olundukda udûl-i Müslimînden Ahmed b. Erdoğdu ve Ömer b. Mahmud nâm kimesneler li-ecli’ş-şehâde meclis-i şer‘-i şerîfe hâzırân olup fi’l-vâki‘ mezbûr Mehmed’i merkūm Gazanfer ba‘de’l-ışâ bıçak ile sağ koltuğu altında bıçak ile urup mecrûh eyledi. Husûs-ı mezbûra şâhidleriz şehâdet-i şer‘iye dahi ederiz dediklerinde mezbûrların şehâdetleri hayyiz-i kabûlde vâki‘ oldukda [mâ hüve’]l-vâki‘ gıbbe’t-taleb ketb olundu. Fi’t-târîhi’l-mezbûr. Tahrîren fî-şehr-i Zilhicce li-sene isneyn ve iş[rîn ve elf]. Şü[hûdü’l-hâl]: Murad b. Abdullah, İbrâhim b. Receb, Receb b. Abdullah el-Muhzır, Mehmed b. Mustafa el-muhtesib ve gayruhum