Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 56 Hüküm no: 33 Orijinal metin no: [11-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gülizar Hatun bt. Abdullah’ın evini İsmail Ağa b. Uğurlu’ya satması Hazret-i Ebî Eyyûb el-Ensârî -aleyhi’r-rahmeti’l-Bârî- muzâfâtından Hasköy’e tâbi‘ Südlüce mahallâtından Mahmud Ağa mahallesi sâkinelerinden Gülizar Hatun bt. Abdullah nâm hatun meclis-i şer‘-i şerîfde işbu sahibü’l-kitâb fahrü’l-akrân İsmail Ağa b. Uğurlu nâm kimesne mahzarında bi-tav‘ihâ ikrâr ve i‘tirâf edüp mahalle-i mezbûrede vâki‘ bir tarafı Mehmed Ağa mülküne ve bir tarafı Ali Beşe mülküne ve bir tarafı Ayşe Hatun mülküne ve bir tarafı tarîk-ı âm ile mahdûd olan bir bâb tahtânî mülk menzilimi ve sofayı ve bağçeyi ve müşterek nısf-ı kuyuyu mesfûr İsmail Ağa’ya üç bin beş yüz nakd-i râyic fi’l-vakt fıddî akçeye bey‘-ı bâtt-ı sahîh-i şer‘î ile bey‘ edüp kabz-ı semen-i ma‘dûd ve teslîm-i mebî‘-i mahdûd kıldım. Ba‘de’l-yevm mülk-i müşterâsıdır. Keyfe mâ yeşâ ve hasbemâ yahtâr mutasarrıf olsun dedikde mukırra-i mezbûrenin ikrâr-ı meşrûhasını el-mukarru lehu’l-merkūm İsmail Ağa vicâhen tasdîk ve şifâhen tahkīk edicek mâ hüve’l-vâki‘ alâ vukū‘ihî ketb olundu. Ve hurrire fi’l-yevmi’r-râbi‘ min-şehri Saferü’l-hayr li-sene selâse ve işrîn ve elf. Şuhûdü’l-hâl: Mehmed b. (…), Mehmed b. Surûrî el-imâm, Mehmed b. Surûrî el-imâm, Hüseyin b. Abdurrahmân, Hasan Kethudâ b. Abdullah, Ali Beşe b. Abdullah er-râcil, Hüseyin b. Nebi, Mustafa b. Mehmed, Mehmed b. Mustafa, Receb b. Abdullah ve gayruhum mine’l-hâzırîn