Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 57 Hüküm no: 34 Orijinal metin no: [12-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Bey’in Papas İskelesi’ndeki dükkân, oda ve mahzenini satması Hazret-i Ebî Eyyûb el-Ensârî -aleyhi’r-rahmeti’l-Bârî- muzâfâtından Hasköy sâkinlerinden Hasan Bey b. Hüseyin nâm kimesne meclis-i şer‘-i şerîfde işbu bâ‘isü’l-kitâb Nikola v. İstimad nâm zimmî mahzarında bi’t-tav‘ ve’r-rızâ ikrâr ve i‘tirâf edüp karye-i mezbûrede vâki‘ Papas İskelesi demek ile ma‘rûf mevzi‘de bir tarafı Zaharya mülküne ve üç tarafı tarîk-ı âm ile mahdûd olup merhûm Kiremitci Hacı Şaban Vakfı’ndan olup cânib-i vakfa her mâh yüz yirmi akçe icâre-i müeccelesi ile taht-ı tasarrufumda olan bir bâb tahtânî dükkânı ve bir bâb üstünde fevkānî odayı ve bir bâb mahzeni mesfûr Nikola’ya sekiz bin altı yüz nakd-i râyic fi’l-vakt fıddî akçeye bey‘-i bâtt-ı sahîh-i şer‘î ile bey‘ edüp kabz-ı semen-i ma‘dûd ve teslîm-i mebî‘-i mahdûd kıldım. Ba‘de’l-yevm mülk-i müşterâsıdır. Keyfe mâ yeşâ ve hasbemâ yahtâr mutasarrıf olsun dedikde mukırr-ı mezbûrun ikrâr-ı meşrûhunu el-mukarru lehu’l-merkūm Nikola vicâhen tasdîk ve şifâhen tahkīk edicek mâ hüve’l-vâki‘ ketb olundu. Ve hurrire fi’l-yevmi’l-hâmis min-şehr-i Saferü’l-hayr li-sene selâse ve işrîn ve elf. Şuhûdü’l-hâl: Mustafa b. Hasan el-Cündî, Hoca Mehmed Bey b. Abdullah el-Cündî, Mehmed b. Mustafa, Hüsrev b. Abdullah, Ahmed Çelebi b. Abdullah, Bekir Çelebi b. Cafer, Receb b. Abdullah