Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 58 Hüküm no: 36 Orijinal metin no: [13-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüsrev b. Abdullah’ın Şaban mahallesindeki evini e satması Hasköy mahallâtından el-Hâc Şaban mahallesi sâkinlerinden Hüsrev b. Abdullah nâm kimesne meclis-i şer‘de işbu bâ‘isetü’l-kitâb Nesli bt. Mehmed nâm hatun mahzarında bi’t-tav‘ ve’r-rızâ’s-sâf ikrâr ve i‘tirâf edüp mahalle-i mezbûrede vâki‘ bir tarafı Hasan Bölükbaşı mülküne ve bir tarafı Haffâf Ali Bey mülküne ve bir tarafı tarîk-ı hâs ve bir tarafı tarîk-ı âm ile mahdûd olan mülk menzilimi cemî‘ tevâbi‘iyle ve levâhıkıyla mesfûre Nesli Hatun’a üç bin akçeye bey‘-i bâtt-ı sahîh-i şer‘î ile bey‘ edüp kabz-ı semen-i ma‘dûd ve teslîm-i mebî‘-i mahdûd kıldım. Ba‘de’l-yevm mülk-i müşterâsıdır. Keyfe mâ yeşâ ve hasbemâ yahtâr mutasarrıf olsun dedikde mukırr-ı mezbûrun ikrâr-ı meşrûhunu el-mukarru lehe’l-mezbûre Nesli Hatun vicâhen tasdîk ve şifâhen tahkīk edicek mâ hüve’l-vâki‘ gıbbe’t-taleb ketb olundu. Ve hurrire fi’l-yevmi’s-sâlis aşer min-şehr-i Saferü’l-hayr li-sene selâse ve işrîn ba‘de elf. Şuhûdü’l-hâl: Hoca Mehmed Bey b. Abdullah el-Cündî, Rüstem Çorbacı b. Mehmed, Mehmed b. Haydar el-müezzin, Kasım b. Ali el-müezzin, Mahmud Çelebi b. Hasan el-imâm, Mustafa b. Mahmud, Fazlı Bölükbaşı b. Yusuf, Ahmed Ağa b. Abdullah, Ali b. Ahmed er-râcil, Mustafa b. Abdi er-râcil, Mehmed b. Mustafa, Receb b. Abdullah ve gayruhum