Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 59 Hüküm no: 40 Orijinal metin no: [14-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pîrî Mehmed Paşa Vakfı’na ait Hasköy’deki hamamın tamirine izin verilmesi Merhûm Pîrî Mehmed Paşa Vakfı’na hâlen mütevellî olan fahrü’ş-şürefâ’i’s-sâdât ve zahru erbâbü’ş-şerafi ve’s-siyâde es-Seyyid Ali Efendi b. es-Seyyid Mehmed mahfil-i kazâya gelip takrîr-i kelâm edüp merhûm-ı mesfûrun Hasköy demekle ma‘rûf karyede vâki‘ merhûm-ı mezbûra intimâ ve intisâb ile tahdîd ve tavsîfden müstağnî olan vakf hamamının ve su yollarının «ba‘z-ı mevâzi‘i ta‘mîr ve tecdîde muhtâc olmuşdur. Kıbel-i şer‘den üzerine varılıp ne mikdâr akçe» kubbelerinin ve derelerinin ve eteklerinin ve camlarının ve külhan ve hazînesinin ve su [yo]llarının ba‘zı mevâzi‘i ta‘mîr ve tecdîde muhtâc olmuşdur. Kıbel-i şer‘den üzerine varılıp ne mikdâr akçe ile ta‘mîr ve tecdîdi kābildir. Tahmîn-i sahîh ile tahmîn ve vâki‘ hâl tahrîr ve beyân olunup ta‘mîr ve tecdîdine izin verilmesin taleb ederim dedikde kıbel-i şer‘den üzerine ve hâssa mi‘mârlardan Üstâd Mustafa b. Abdullah ve Üstâd Yusuf b. Abdullah ve zeyl-i kitâbda isimleri muharrer olan Müslimîn ile üzerine varılıp nazar olundukda zikri sebk eden mevâzi‘in câ-be-câ yerleri ta‘mîr [ve] tecdîde eşedd-i ihtiyâc ile muhtâc idüğü mukarrer ve muhakkak olup ta‘mîr ve tecdîde muhtâc olan mevâzi‘in kireç ve bezir yağı ve horasan ve ketân ve kiremid ve beş dâne ateşhânesine ve demirine ve …? tahliyesine ve bu cümlenin üstâdiyye ve ırgādiye vesâir mühimmât-ı lâzımesine ancak yedi bin akçe kifâyet eder, meblağı [mer]kūmdan nâkıs ile husûlü mümkin değildir deyü mi‘mârân-ı mezbû[râ]n ve sâir ehl-i vuk[ū]f haber vermeğin ta‘mîr ve tecdîde izn-birle bu hurûf bi’t-taleb ketb olundu. Fi’l-yevmi’l-işrîn min-şehr-i Rebî‘i’l-âhir li-sene selâse ve işrîn ve elf. Şuhûdü’l-hâl: Mahmud Halîfe b. Mustafa el-imâm, Kasım Bey b. Abdullah es-sarrâc, Hüseyin b. Nasuh es-sarrâc, Mustafa b. Osman, Ebûbekir Çelebi b. Cafer er-râcil, Hüsrev? b. Abdullah el-mütevellî, Kasım b. Ali el-müezzin, Mustafa Bey b. Hasan el-Cündî, Receb b. Ayvan? el-Muhzır, Mehmed Çelebi el-muhtesib