Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 60 Hüküm no: 41 Orijinal metin no: [15-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasköy Zâbiti Rüstem Subaşı’nın Okmeydanı Karlık yakınlarında namahremiyle birlikte oturanları yakalaması Havâss-ı aliyye muzâfâtından Hasköy demekle ma‘rûf karyede hâlen zâbit olan Rüstem Subaşı mahfil-i kazâya gelip takrîr-i kelâm edüp Okmeydânı’nda Karlık kurbünde bir yerde nâ-mahremler otururlar imiş kıbel-i şer‘den üzerine varılıp vâki‘ hâl keşf ve mahâllinde tahrîr olunmasın taleb ederim deyicek zeyl-i kitâbda mastûrü’l-esâmî olan Müslimîn ile üzerine varılıp nazar olundukda fi’l-vâki‘ Karlık kurbünde mevzi‘-i mezbûrede Rahime nâm hatun bt. Abdullah ve Alidıraz b. Abdullah nâm kimesneler bir yerde bulunup suâl olundukda gıbbe’s-suâl mezbûre Rahime Hatun ben Mehmed nâm kimesnenin nigârıyım lâkin sizi gördükde firâr etdi, mezbûr Alidıraz bizim refîkimizdir ve mezkûr Alidıraz dahi suâl olundukda ben mezbûre Rahime nâm hatunun ve Mehmed’in refîki[yim] mevzi‘-i mezbûra bile geldim dedikde mezbûrânlar birbirlerine nâ-mahrem olduklarını i‘tirâf etdikde mâ vaka‘a alâ-vukū[ihî] bi’t-taleb ketb olundu. Tahrîren fi’l-yevmi’s-sâbi‘ ve’l-ışrîn min-şehr-i Rebî‘ülâhir li-sene 1023. Şuhûdü’l-hâl: Mahmud Halîfe el-imâm, Hüseyin Bey er-râcil, Mehmed Bey er-râcil, Abdullah b. Mustafa, Mustafa b. Hasan er-râcil, Derviş b. İbrâhim, Selim b. Ramazan, Mehmed Çelebi el-muhtesib ve gayruhum mine’l-hâzırîn