Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 61 Hüküm no: 42 Orijinal metin no: [15-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âmine bt. Ahmed’in kendisini boşayan eşinden alacak hakkının kalmadığı Havâss-ı aliyye kazâsı muzâfâtından Hasköy mahallesinde sâkine Âmine bt. Ahmed nâm hatun meclisü’ş-şer‘i’ş-şerîf-i lâzımü’t-teşrîfde işbu bâ‘isü’l-kitâb zevci Hasan Çavuş b. Fazlullah mahzarında ikrâr ve takrîr-i kelâm edüp bundan akdem beynimizde münâza‘ât-ı kesîremiz oldukda mezbûr Hasan Çavuş beni talâk-ı selâse ile tatlîk eylediğinde zimmetinde lâzım olan beş bin akçe mehr-i müeccelim ve nafaka-i iddetim bi’t-tamam ve’l-kemâl alıp kabz eyledim. Mezbûr çavuş zimmetinde bir akçe ve bir habbe hakkım bâkī kalmadı dedikde mukırra-i mezbûre Âmine Hatun’un ikrâr-ı meşrûhasında bi’l-muvâcehe mezbûr Hasan Çavuş tasdîk ve tahkīk etmeğin mâ hüve’l-vâki‘ bi’t-taleb ketb olunup yed-i tâlibe def‘ olundu. Tahrîren fi’l-yev[m]i’s-sâbi‘ min-şehr-i Cemâziyelevvel li-sene selâse ve işrîn ve elf. Şuhûdü’l-hâl: Mübâşir Mahmud Çavuş b. Ali el-Cündî, Ahmed Halîfe el-imâm, Mahmud Halîfe el-imâm, Mustafa Bey el-Cündî, Mustafa Çelebi b. Kaya es-sarrâc, İlyas Çavuş b. Sadi Çavuş, Mehmed Çelebi b. Mustafa el-[mu]htesib, Receb b. Abdullah ve gayruhum mine’l-hâzırîn