Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 61 Hüküm no: 43 Orijinal metin no: [16-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Paşa Vakfı’na ait kiremit fırınının tamirine izin verilmesi Mahmiye-i Ga[la]ta mahallâtından Sultan Bâyezid mahallesinde sâkine Laskarina bt. Aleksandıra nâm zimmiye tarafından husûs-ı âti’z-zikre vekîl olup nehc-i mu‘teber üzre vekâleti sâbit olan Davud Çavuş b. Cafer mahfil-i kazâya gelip takrîr-i kelâm edüp Hasköy nâm karye mahallâtından Turşucu Hüseyin Çelebi mahallesinde vâki‘ merhûm Mustafa Paşa Vakfı’ndan olup lede’l-ahâlî ve’l-cîrân ma‘lûmü’l-hudûd olup icâre-i mu‘accele ve müeccele ile tasarrufunda olan iki bâb kiremid fırının birisi yıkılıp ta‘mîr ve tecdîde muhtâc olmuşdur. Kıbel-i şer‘den ta‘mîrine izn verilmesin taleb ederim deyip Yiğitbaşı Hasan b. Abdullah ve Hüsrev Bey b. Abdullah ve Muslu Çelebi b. Hasan el-Cündî ve Mahmud Çelebi b. Mustafa ve Müstedam Bey b. Abdullah ve Bekir Çelebi b. Cafer ve İbrâhim b. İbrâhim cemm-i kesîr ve cemm-i gafîr Müslimîn fi’l-vâki‘ zikri sebk eden fırının birisi yıkılıp ta‘mîr ve tecdîde eşedd-i ihtiyâc ile muhtâcdır. Eğer ta‘mîr ve tecdîd olunmazsa bi’l-külliye harâb olup gadr olmak lâzım gelir deyü haber verdiklerinde iltimâsları üzre ta‘mîre izn-birle bu hurûf ketb olundu. Tahrîren fi’l-yevmi’l-âşir min-şehr-i Rebî‘i’l-evvel li-sene selâse ve işrîn ve elf. Şuhûdü[‘l-hâl]: Mehmed Bey b. Abdullah, Hüseyin Bey b. Nasuh, Te[r]zi Mehmed b. Abdullah, Receb b. Abdullah, Mehmed Çelebi el-muhtesib