Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 64 Hüküm no: 48 Orijinal metin no: [18-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Bey’in bağını satması Oldur ki, mahmiye-i Kostantıniyye mahallâtından Haraçcı mahallesi sâkinlerinden Hüseyin Bey b. İbrâhim Ağa tarafından husûs-ı âti’z-zikri bey‘a vekîl olup vekâleti Hüsrev Bey b. Abdullah ve Mustafa Bey b. Abdülmennan şehâdetleriyle sâbite olan İbrâhim Ağa b. Abdülmennan nâm kimesne meclis-i şer‘-i şerîf-i lâzımü’t-tevkīrde hâmil-i hâze’l-kitâb Ali Çelebi b. Kurd nâm kimesne mahzarında ikrâr ve i‘tirâf edüp müvekkilim merkūm Hüseyin’in havâss-ı Kostantıniyye muzâfâtından Hayköy[Hasköy] tevâbi‘inden Südlüce nâm mahalle kurbünde Kurdbağları demekle ma‘rûf mevzi‘de vâki‘ bir tarafı müşteri el-mezbûr tarlasına ve bir cânibi Hasan Paşa bağına ve bir tarafı Mehmed Çelebi bağına ve bir tarafı tarîk-ı âmma müntehî olan bir kıt‘a bağını vekâlet-i mahkiyem hasebiyle merkūm Ali Çelebi’ye beş bin akçeye bey‘-i bât ile bey‘ edüp teslîm-i mebî‘-i mahdûd ve kabz-ı semen-i ma‘dûd edüp keyfe mâ yeşâ ve yahtâr mutasarrıf olsun dedikde mukırr-ı mezbûr vekîlin vech-i meşrûh üzre cârî ve sâdır olan ikrârını merkūm Ali Çelebi vicâhen ve şifâhen tasdîk etdikden sonra bu hurûf gıbbe’t-taleb kayd-ı sicil olundu. Tahrîren fî-şehr-i Recebi’l-mürecceb li-sene selâse ve işrîn ve elf mine’l-hicreti’n-nebeviye. Şuhûdü’l-hâl: Mehmed Bey el-Cündî, Hasan Halîfe b. Abdüsselam, Ferhad b. Abdullah, Mahmud Çelebi b. Mehmed el-imâm, Ramazan b. Abdullah, Hasan Beşe b. Abdullah ve gayruhum