Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 64 Hüküm no: 49 Orijinal metin no: [18-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Kurd’un babası tarafından vakfedilen parayı teslim aldığı Oldur ki, havâss-ı Kostantıniyye muzâfâtından Hasköy mahallâtından Abdüsselam mahallesinden olup bundan akdem müteveffâ olan Kurd nâm kimesne hâl-i hayatında ve kemâl-i sıhhatinde kendi rûhu içün eczâ-yı şerîfe tilâveti içün vakf eylediği yirmi bin akçenin istirbâhı ve istiğlâline evlâddan mütevellî olan Ali b. Kurd nâm kimesne meclis-i şer‘-i şerîf-i lâzımü’t-tevkīrde hâmil-i hâze’l-kitâb İbrâhim Ağa b. Abdülmennan nâm kimesne mahzarında ikrâr ve takrîr-i kelâm edüp bundan akdem merkūm İbrâhim Ağa bana vasî olan Mehmed b. Haydar’ın üzerine nâzır olmağla meblağ-ı mezbûru ilâ-hâze’l-ân istirbâh ve istiğlâl edüp hâlen meblağ-ı mezbûrdan mukaddemâ on beş bin ve hâlen beş bin akçe ki cem‘an yirmi bin akçeyi tevliyetim hasebiyle merkūm İbrâhim Ağa yedinden alıp kabz eyledim. Mâl-ı vakıfdan zimmetinde bir akçe kalmadı dedikde mukırr-ı mezbûr mütevellînin vech-i meşrûh üzre cârî ve sâdır olan ikrârını merkūm İbrâhim Ağa vicâhen ve şifâhen tasdîk etdikden sonra hasb-i hâle temessük iltimâs eylemeğin bu hurûf gıbbe’t-taleb ketb ü terkīm olunup tâlibi yedine vaz‘ ve def‘ olundu. Tahrîren fî-şehr-i Recebi’l-mürecceb sene selâse ve işrîn ve elf. Şuhûdü’l-hâl: Mehmed Bey el-Cündî, Mustafa Bey el-Cündî, Hüseyin Halîfe el-imâm, Ferhad b. Abdullah, Mahmud Çelebi [el-imâm], Ramazan b. Abdullah, Hasan Beşe b. Abdullah ve gayruhum mine’l-hâzırîn