Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 65 Hüküm no: 50 Orijinal metin no: [19-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Bey’in Hasköy’de bakkal dükkânı ve mahzenini satması Oldur ki, mahmiye-i Galata’ya tâbi‘ Kasımpaşa mahallâtından Kulaksız mahallesi sâkinlerinden Hasan Bey b. Hüseyin nâm kimesne meclis-i şer‘-i şerîf-i lâzımü’t-tevkīrde havâss-ı Kostantıniyye tevâbi‘inden Hasköy mahallesi mütemekkinlerinden Paskal v. Yorgi ve Rizo v. Dimitri ve diğer Rizo v. Apostol nâm zimmîler mahzarlarında bi-tav‘ihiikrâr ve takrîr-i kelâm edüp Has mahallesinde vâki‘ bir tarafı Timur Çavuş’un vakıf dükkân yerine ve bir tarafı Kera nâm Yahûdî mülküne ve bir tarafı tarîk-ı hâssa ve bir tarafı tarîk-ı âmma müntehî olan mülk bir bâb bakkāl dükkânımı ve bir bâb mahzenimi harîmiyle ve dâhilinde iki kuyusuyla cümle tevâbi‘ ve levâhıkıyla olan dükkân ve mahzenimin sülüsânı merkūm Paskal zimmîye sekiz bin altı yüz altmış altı akçeye ve sülüsünü merkūmân Rizo ve diğer Rizo nâm zimmîlere, dört bin üç yüz otuz dört akçeye ve her ayda altmış akçesin Şaban Vakfı’na edâ etmek üzre mütevellîsi olan Kasım b. Ali ma‘rifetiyle bey‘-ı bâtt-ı sahîh-i şer‘î ile bey‘ edüp teslîm-i mebî‘-i mahdûd ve kabz-ı semen-i ma‘dûd etdim. Ba‘de’l-yevm mahdûd-ı mezbûru merkūmûn keyfe mâ yeşâ ve yahtâr sâir mülkleri gibi mutasarrıf olsunlar dedikde mukırr-ı mezbûrun vech-i meşrûh üzre cârî ve sâdır olan ikrârını merkūmûn zimmîler vicâhen ve şifâhen tasdîk ve tahkīk etdikden sonra mütevellî-i merkūm dahi mezkûr Hasan Bey’in bey‘ini tecvîz etdim dedikde bu hurûf gıbbe’t-taleb ketb ü tahrîr olunup yed-i tâlibe vaz‘ u def‘ olundu ki, lede’l-hâce müzekkir-i mâ cerâ ola. Tahrîren fi’l-yevmi’l-hâdî aşer min-Recebi’l-mürecceb li-sene selâse ve işrîn ve elf. Şuhûdü’l-hâl: Murad Bey b. Abdullah, Mahmud Bey b. Mehmed, Kasım Bey b. Abdullah, Müezzin Mehmed b. Haydar, Derviş Mehmed b. Hüseyin, Mehmed b. Abdulkadir, Pervâne b. Abdullah, İbrâhim b. Receb, Hüsrev Bey b. Ali el-mütevellî, Albino v. Yani, Dimi v. Kostantin ve gayruhû mine’l-hâzırîn