Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 66 Hüküm no: 52 Orijinal metin no: [20-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaptan Sinan Paşa Camii Vakfı’na ait Hasköy’deki fırının tamir keşfi Oldur ki kasaba-i Beşiktaş’da merhûm Kapdan Sinan Paşa binâ eylediği câmi‘-i şerîf evkāfından nefs-i Hasköy’de vâki‘ bir bâb vakıf ekmekci fırunu dükkânında müste’cir olan Murad Subaşı b. Abdullah ve Aristos v. Yani nâm kimesneler meclis-i şer‘-i şerîfe gelip takrîr-i kelâm ve ta‘bîr ani’l-merâm edüp îcâr eylediğimiz dükkânın sakfı ve duvarı bundan akdem yıkılıp harâb olmağla biz dahi izn-i hâkim ve vakf-ı mezbûra mütevellî olan Mehmed Bey b. Musa ma‘rifetiyle binâ edüp fırunun sakfı ve duvarı vesâir harc-ı lâzımesi ne mikdâr meblağ ile binâ olduğuna cânib-i şer‘den üzerine varılıp tahmîn olunup vâki‘-i hâl tahrîr olunmasın taleb ederiz dediklerinde hâssa mi‘mârlardan Üstâd Mustafa b. [Abdullah] ve mütevellî-i mezbûr Mehmed Bey ve zeyl-i kitâbda mastûr olan bî-garaz Müslimânlar ile mahâll-i mezbûra varılıp binâ olunan mevâzi‘i ber-vech-i adâlet [mü]şâhede etdiklerinde zikrolunan fırunun duvarı bennâ zirâ‘ıyla addolunup otuz zirâ‘ taş duvarı olup binâsı iki bin dört yüz akçeye ve etrâf-ı selâ[se]si tahta duvar olup addolundukda üç yüz tahta bulunup ve mismârı ve kuşakları ile dört bin altı yüz akçeye ve iki orta direk her direği yüz yirmişer akçe hesâbı üzre iki yüz kırk akçeye ve beş kürsî taşı pereme harcıyla yüz elli akçeye ve tûlü on üç zirâ‘ ve arzı yedi zirâ‘ ve sakfı yüz zirâ‘ olup beher zirâ‘ı kırkardan dört bin akçeye ve sakfında cedîd iki bin kiremit bulunup bin akçeye ve neccâriye ve ırgādiye bin akçeye ve mahdûd iki kapı ihdâsına altı yüz akçeye ve berây-ı? mancılık? vesâir harc-ı lâzımesin bin on akçeye ve bir anbâr ve kenîfine bin akçeye tahmîn-i sahîh ile tahmîn edüp ancak on altı bin akçeye binâ olunur deyü mi‘mâr-ı mezbûr vesâir ehl-i vukūf haber verdiklerinden sonra müste’cirân-ı mezbûrân haseb-i hâle temessük iltimâs eylemeğin bu hurûf ketb ü tahrîr ve terkīm ü tersîm olunup yed-i tâlibe vaz‘ ve def‘ olundu ki lede’l-hâce müzekkir-i mâ cerâ ola. Tahrîren fi’l-yevmi’l-hâmis aşer min-şehr-i Recebi’l-mürecceb sene selâse ve işrîn ve elf. Şuhûdü’l-hâl: Üstâd Hasan, Osman Bey b. Abdullah, Ramazan b. Hüseyin, Mehmed b. Hasan, el-Hâc Mustafa b. Abdullah, Mehmed b. Abdülkadir, Mehmed b. Mustafa, Receb b. Abdullah ve gayruhum mine’l-hâzırîn