Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 67 Hüküm no: 53 Orijinal metin no: [20-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaptan Sinan Paşa Vakfı’na ait Hasköy’deki harap mahzenin inşası keşfi Oldur ki, havâss-ı Kostantıniyye’ye tâbi‘ Hasköy mahallesi sâkinlerinden Hasan b. Nasuh nâm kimesne meclis-i şer‘-i şerîfe gelip takrîr-i kelâm ve ta‘bîr ani’l-merâm edüp kasaba-i Beşiktaş’da merhûm Kapudan Sinan Paşa binâ eylediği câmi‘-i şerîf evkāfından Hasköy’de vâki‘ bir bâb vakıf mahzen mütevellîsi olan, eser-i binâdan bir şey kalmayıp müceddeden binâ etmek murâd eder. Cânib-i şer‘den üzerine varılup ne mikdâr meblağ ile binâ olacağı tahmîn olunup vâki‘ [hâlin] tahrîr olunmasın taleb ederim dedim dedikde hâssa mi‘mârlardan Üstâd Mustafa b. A[bdullah] ve vakf-ı mezbûra mütevellî olan merkūm Mehmed Bey ve [zeyl-i kitâbda] [21] mastûrü’l-esâmî olan bî-garaz Müslimânlar ile harâb olan mahzen-i mezbûrun üzerine varılıp binâ olacağı mevzi‘i ber-vech-i adâlet müşâhede etdiklerinde bennâ zirâ‘ı ile tûlü on beş zirâ‘ ve arzı yedi zirâ‘ ve sakfı doksan zirâ‘ addolunup her zirâ‘ı altışar akçeden dört bin beş yüz akçeye ve etrâfı tahta duvar olup yüz iki tahta her tahtası on beş akçe hesâbı üzre bin altı yüz elli akçeye ve neccâriye ve ırgādiye ve direklerine ve sâir harc-ı lâzımesine bin dokuz yüz akçeye, deyü ancak sekiz bin akçe kifâyet eder. Meblağ-ı merkūmdan nâkıs ile husûlü mümkin değildir deyü mi‘mâr-ı mezbûr ve sâir ehl-i vukūf haber vermeğin müteve[llî-i] m[ezbûr] ma‘rifetiyle binâ ve ta‘mîr ve tecdîde izn-birle bu hurûf gıbbe’t-taleb ketb ü tahrîr olunup yed-i tâlibe vaz‘ ü def‘ olundu. Tahrîren fî 16 şehr-i Recebi’l-mürecceb li-sene selâse ve işrîn ve elf. Şuhûdü’l-hâl: Üstâd Hasan, Osman Bey b. Mustafa, Ramazan b. Hüseyin, Mehmed b. Hasan, el-Hâc Mustafa b. Abdullah, Ali b. Mahmud, Mehmed b. Abdülkadir, Mehmed b. Mustafa, Ramazan [b.] Ali, Receb b. Abdullah ve gayruhum