Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 68 Hüküm no: 54 Orijinal metin no: [21-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa’nın Turşucu mahallesindeki bağını ve cariyesini oğlu Süleyman’a hibe ettiği Oldur ki, mahmiye-i Kostantıniyye mahallâtından Haraçcı mahallesi sâkinlerinden İbrâhim Ağa b. Abdülmennan nâm kimesne meclis-i şer‘-i şerîf-i lâzımü’t-tevkīre hazır olup takrîr-i kelâm ve ta‘bîr ani’l-merâm edüp taht-ı tasarrufumda Hasköy mahallâtından Turşucu mahallesinde vâki‘ bir cânibi el-Hâc Mustafa bağına ve bir cânibi Kuzucu Hüseyin Çelebi bağına ve bir cânibi diğer Hüseyin Çelebi bağına ve bir cânibi tarîk-ı âmma müntehî ve mahdûd olan tûlü altmış ve arzı otuz beş zirâ‘ mülk bir kıt‘a bağımı ve Rusiyyü’l-asl Gülistan nâm câriyemi sagīr oğlum Süleyman’a hîbe-i sahîha-i şer‘iye ile hîbe ve temlîk edüp mahdûd-ı mezbûr ve câriye sagīr-i mezbûr Süleyman’ın mülk-i mevhûbudur. Ba‘de’l-yevm mahdûd-ı mezbûr bağı ve câriyeyi velâyetim hasebiyle kabz edüp oğlum sagīr-i mezbûr içün tasarruf ederim dedikde mukırr-ı mezbûrun vech-i meşrûh üzre cârî ve sâdır olan ikrârı ketb ü tahrîr ve terkīm ü tersîm olunup tâlibi yedine vaz‘ olundu. Tahrîren fi’l-yevmi’t-tâsi‘ aşer min-şehr-i Receb sene 1023. Şuhûdü’l-hâl: Behruz Bey Mîr-i mîrân-ı Habeş, Mustafa Bey b. Hasan el-Cündî, Mehmed Bey el-Cündî, Musa Bey el-Cündî, İbrâhim Halîfe el-imâm, Hasan Halîfe el-imâm, Mehmed Bey el-Cündî, Baba Ferhad b. Abdullah, Mustafa b. Kur[d], Hasan Bey b. Pervâne, Pîrî b. Ali?, Mustafa b. Ali? ve gayruhum