Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 68 Hüküm no: 55 Orijinal metin no: [21-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kurd oğlu Ali’nin, vasîsi olan İbrahim Ağa ile alacakverecekleri kalmadığı Oldur ki, havâss-ı Kostantıniyye muzâfâtından Hasköy mahallâtından Abdüsselam mahallesinden olup bundan akdem müteveffâ olan Kurd’un âkıl ve bâliğ sulbî oğlu olan Ali nâm kimesne meclis-i şer‘-i şerîf-i lâzımü’t-tevkīrde bundan akdem mezbûr Ali’ye ve karındaşı Mehmed’in tesviye-i umûrlarına kıbel-i şer‘den vasî-i mansûb olan kıdvetü’l-emâsil ve’l-akrân İbrâhim Ağa b. Abdülmennan nâm kimesne mahzarında ikrâr ve takrîr-i kelâm edüp (…) karındaşım Mehmed ile sagīr iken babamız müteveffâ-yı mezbûrdan irs-i şer‘le bize âid (…) olan elli altı bin nakid ve sâir muhallefâtımızı merkūm İbrâhim Ağa [22] vesâyeti hasebiyle kabz edüp meblağ-ı mezbûru istirbâh ve istiğlâl edüp zabtında iken karındaşım Mehmed dahi vefât edüp onun hissesi dahi bana intikāl edicek ben dahi vasî-i merkūm Ağa’nın makbûzât ve masrafını gördüğümde meblağ-ı mezbûr elli altı bin akçeden mukaddemâ bana otuz iki bin akçe, kimi nakd ve kimi zimem-i nâsda teslîm edüp ve karındaşım müteveffâ-yı mezbûr Mehmed’in muhallefâtından bana âid ve râci‘ olandan otuz bir bin akçe dahi teslîm edüp onu dahi kabz etdim ve bundan akdem karındaşım Mehmed ile sünnet olduğumuzda vasî-i merkūm libâsımıza ve sâir harcımıza dört bin akçe sarf edüp bu takdîrce merkūm İbrâhim Ağa bana altmış yedi bin akçe teslîmi olup on bir bin akçe ziyâde teslîm edicek merkūm İbrâhim Ağa zimem-i nâsdan bana gösterdiği meblağdan sekiz bin akçenin tahsîli mümkin olmayup edâsı lâzım gelmeğin zimmetimde olan hakkından sekiz bini ref‘ edüp üç bin akçesi kalup ve vasî-i merkūm züyûf akçe zamanında on bin akçe zimem edüp züyûf akçe kâsid, ceyyid akçe cârî oldukda izn-i hâkim ile altı bin yüz seksen akçe kabz edüp üç bin sekiz yüz yirmi akçesi ref‘ olunup def‘ olup meblağ-ı mezbûr[u] mukaddemâ merkūm İbrâhim Ağa[‘dab] kabz etmişidim. El-hâletü-hâzihî merkūm İbrâhim Ağa’nın bende ba‘de küll-i hesâb altı bin yüz yirmi akçesi olup babamız müteveffâ-yı mez[bû]rdan ve karındaşım müteveffâ-yı mezbûr Mehmed’den irs-i şer‘le intikāl eden nakidden ve murâbahadan ve sâir muhallefâtdan cüz’î ve küllî her ne var ise bi’t-tamam alıp kabz edüp merkūm İbrâhim Ağa’nın zimmetini ibrâ ve ıskāt etdim dedikde mukırr-ı mezbûrun vech-i meşrûh üzre cârî ve sâdır olan ikrârını merkūm İbrâhim Ağa vicâhen ve şifâhen tasdîk etdikden sonra merkūm İbrâhim Ağa dahi mezkûr Ali’nin zimmetinde zuhûr eden altı bin yüz yirmi akçe talebinden fâriğ oldum. Min-ba‘d da‘vâ ve nizâ‘ım yokdur. Eğer meblağ-ı mezbûra müte‘allik da‘vâ benden bi’z-zât veyâ bi’l-vekâle sâdır olursa inde’ş-şer‘ mesmû‘a olmasın dedikde tarafeynden sâdır olan ikrârları birbirleri muvâcehelerinde tasdîk etdiklerinden sonra bu hurûf gıbbe’t-taleb ketb ve tahrîr ve terkīm ü tersîm olunup tâlibi yedine vaz‘ u def‘ olundu. Tahrîren fi’l-yevmi’t-tâsi‘ aşer min-şehr-i Recebi’l-mürecceb li-sene selâse ve işrîn ve elf. Şuhûdü’l-hâl: Behruz Bey Mîr-i Mîrân-ı Habeş, Mustafa Bey b. Hasan el-Cündî, Mehmed Bey el-Cündî, Musa Bey el-Cündî, İbrâhim Halîfe el-imâm, Mehmed b. İlyas el-imâm, Hasan Halîfe el-imâm, Baba Ferhad b. Abdullah, Mustafa b. Hasan?, Hasan Bey b. (…)