Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 70 Hüküm no: 57 Orijinal metin no: [23-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. İsmail’in Murad b. Abdullah’a açtığı darb davasında sulh olduğu Sebeb-i tahrîr-i kitâb-ı sıhhat-nisâb budur ki, Havâss-ı aliyye kazâsı muzâfâtından nefs-i Hasköy’de Turşucu mahallesinde sâkin Mehmed b. İsmail nâm kimesne meclis-i şer‘-i hatîr-i lâzımü’t-tevkīrde sahibü’l-kitâb Murad b. Abdullah nâm kimesne mahzarında ikrâr-ı tâm ve takrîr-i kelâm edüp bundan akdem mezbûr Murad «mûcebiyle da‘vâ edüp merkūm Murad dahi münkir olup eytdi deyü» mezbûr Murad beni sol böğrümden taş ile şedîden darb etdi deyü mirâren mûcibin da‘vâ edüp merkūm Murad dahî münkir olup hâlen ben dahi isbât sadedinde iken afv ve ibrânın evlâ ve ahrâ olması mahlûtumuz? [matlûbumuz?] olmağın merkūm Murad’ı zikrolunan darb da‘vâsından ibrâ’ eyledim. Min-ba‘d husûs-ı mezkûra müte‘allik merkūm Murad ile da‘vâ ve husûmetim yokdur. Edersem dahi lede’l-hükkâmi’l-kirâm mesmû‘a ve mukırr makbûle olmasın dedikde mezbûrun vech-i meşrûh üzre cârî olan ikrârın mezbûr Murad vicâhen tasdîk etmeğin vâki‘ hâl gıbbe’t-taleb ketb ve tâlibi yedine vaz‘ u def‘ olundu. Tahrîren fî-evâil-i şehr-i Rebî‘i’l-âhir li-sene erba‘a ve işrîn ve elf. Şuhûdü’l-hâl: (…) Çavuş b. (…), Hızır b. Hanefî, Hüseyin b. Abdullah, Mehmed b. Abdullah, İbrâhim b. Abdullah ve gayruhum mine’l-hâzırîn