Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 71 Hüküm no: 59 Orijinal metin no: [24-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çavuş’un satın aldığı koyun bedeli olarak Panayot v. İstepani’ye borcu kaldığı Oldur ki, havâss-ı aliyye muzâfâtından nefs-i Hasköy’de sâkin fahrü’l-emâcid ve’l-akrân İbrahim Çavuş b. İbrahim meclis-i şer‘-i hatîr-i lâzımü’t-tevkīrde takrîr-i kelâm edüp hâmilü’l-kitâb Panayot v. İstepani nâm zimmî yedinden fıddî-i Osmânî nakd-i râyicü’l-vakt her bir re’si altmışar akçe kıymet etmek üzre iki yüz seksen üç bin yedi yüz yirmi akçeye dört bin yedi yüz yirmi yedi re’s ganem iştirâ eylemiş idim. Zikri sebk eden ma‘lûmü’l-aded olan akçenin otuz binini teslîm edüp bâkī iki yüz elli üç bin akçe lâzımü’l-edâ ve vâcibü’l-kazâ deynimdir dedikde mezbûr Panayot’a suâl olundukda cevâb verip merkūm İbrâhim Çavuş nâm kimesneye bey‘ etdiğim ganem mukābelesinde yedinden otuz bin akçe ahz u kabz eyledim deyü ikrâr ve i‘tirâf eyledikde mukırr-ı mezbûrun vech-i meşrûh üzre cârî olan ikrârın el-mukarru lehu’l-merkūm İbrâhim Çavuş vicâhen ve şifâhen tasdîk ve tahkīk etmeğin vâki‘ [hâl] gıbbe’t-taleb ketb ve tâlibi yedine li-ecli’t-temessük def‘ olundu. Tahrîren fî-evâil-i Cumâdelûlâ li-sene erba‘a ve işrîn ve elf. Şuhûdü’l-hâl: Mehmed b. Mustafa, Receb Bey el-Cündî, Müstedam Bey b. Abdullah, Mehmed b. el-Cündî ve gayruhum mine’l-hâzırîn