Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 95 Hüküm no: 110 Orijinal metin no: [44-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keçeci Hacı Mehmed Vakfı’na istiğlal tarîki ile satılan ev için vekil tayini Havâss-ı aliyye kazâsı muzâfâtından kasaba-i Hasköy mahallâtından Kiremidci Ahmed Çelebi mahallesinde sâkin Tilef v. Baruh nâm Yahûdî meclis-i şer‘-i şerîfde yine mahalle-i mezbûrda sâkin işbu bâ‘isü’l-kitâb Menahim v. Taler nâm Yahûdî muvâcehesinde ikrâr ve takrîr-i kelâm edüp yine mahalle-i merkūmede vâki‘ lede’l-ahâlî ve’l-cîrân ma‘lûmü’l-hudûd gāib ani’l-meclis karındaşım Mehmed nâm mühtediyle iştirâk-i seviy üzerine mutasarrıf olduğumuz menzilimizi kasaba-i mezbûrda vâki‘ Keçeci el-Hâc Mehmed Vakfı’na bi’l-fi‘l mütevellî olan Abdurrahman Çelebi’den vakf-ı mezbûr malından merkūm ile yirmi bin alıp istiğlâl tarîki üzre zikrolunan menzilimizi bey‘ edüp ol dahî senede üç bin akçe ücret ile ikimize îcâr eyledi. Biz dahi istîcâr ve kabûl eyledikden sonra yine menzil-i mahdûd-ı mezkûru mütevellî-i mezbûrun izniyle mezbûr Menahim senede üç bin akçe ücreti mütevellî-i mezbûr Abdurrahman Çelebi’ye edâ edüp ve ziyâdeye dahî îcâr edüp hâsıl olan ücreti kendüye de [kendi yedinde] hıfz ve deynimiz zuhûr edüp taleb eylediklerinde edâya karındaşım mezbûr Mehmed merkūm Menahim[‘i] vekîl eylemiş idi. Ben dahi minvâl-i muharrer üzre vekîl-i menâb ta‘yîn eyledim dedikde ol dahî vekâlet-i mezbûreyi kabûl ve hızmet-i lâzımesin edâya müte‘ahhid olmağın mâ hüve’l-vâki‘ bi’t-taleb ketb olundu. Fî-şehr-i Rebî‘i’l-âhir li-sene selâse ve seb‘în ve elf. Şuhûdü’l-hâl: Receb Efendi b. Ali, Mustafa Çelebi b. Pîrî, Mustafa Çelebi b. Yakub, Mahmud Çelebi b. Mehmed, Ali Bey b. Abdullah, Mehmed Bey b. Abdullah, Dilaver Bey b. Abdullah, İbrâhim Çelebi