Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 98 Hüküm no: 117 Orijinal metin no: [48-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Süleyman’ın Ahmed Çelebi mahallesindeki bahçesini satması Oldur ki, Hasköy mahallâtından Ahmed Çelebi mahallesi sâkinelerinden Havva bt. Süleyman nâm hatun mahfil-i kazâda işbu sahibü’l-kitâb Mahmud Çelebi b. Mehmed nâm kimesne mahzarında ikrâr ve takrîr-i kelâm edüp mahalle-i mezbûrede vâki‘ bir tarafı Mi‘mâr bağçesine ve bir tarafı Ömer Bey odalarına ve bir tarafı Hüseyin Bey Vakfı’na ve bir tarafı dereye müntehî olup eşcâr-ı müsmire ve gayr-ı müsmireyi müştemil olan bir kıt‘a mülk bağçemi merkūm Mahmud Çelebi’ye yedi bin nakd-i râyic fi’l-vakt fıddî akçeye bey‘-ı bâtt-ı sahîh-i şer‘î ile bey‘ edüp kabz-ı semen-i ma‘dûd ve teslîm-i mebî‘-i mahdûd eyledim. Ba‘de’l-yevm mülk-i müşterâsıdır. Keyfe mâ yeşâ ve yahtâr mutasarrıf olsun dedikde mukırra-i merkūmeyi ikrâr-ı meşrûhasında el-mukarru lehu’l-mezkûr bi’l-muvâcehe tasdîk edicek mâ hüve’l-vâki‘ ketb olundu. Tahrîren fî-evâsıt-ı Ramazani’l-mübârek sene ihdâ ve selâsîn ve elf. Şuhûdü’l-hâl: Ahmed Efendi b. Cafer el-imâm, el-Hâcc Behcet b. Abdullah, Hasan Bey b. Nasuh Sarrâcü’l-Hâssa, Osman Bey [b.] Mustafa Sarrâcü’l-Hâssa, Ahmed b. Abdullah el-Cündî, Kasım Bey b. Abdullah Sarrâcü’l-Hâssa, Mehmed Çelebi b. Mehmed Kapudan, Mehmed Reis el-müezzin, Mehmed b. Mustafa Kuyucuzâde