Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 99 Hüküm no: 120 Orijinal metin no: [49-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Subaşı Sinan Bey’in vefat edip muhallefatı beytülmala kalan Halil’in Murad Beşe’deki alacağını tahsil ettiği Oldur ki, Hasköy’de bi’l-fi‘il subaşı olan Sinan Bey b. Abdullah meclis-i şer‘de işbu hâmilü’l-kitâb Murad Beşe b. Abdullah mahzarında takrîr-i kelâm edüp mezbûr Murad Beşe zimmetimde bundan mukaddem Hasköy’de sâkin iken vefât edüp muhallefâtı beytü’l-mâla âid olan Halil nâm kimesnenin beş sikke-i hasenesi vardır deyü ikrâr ve i‘tirâf ettikde i‘tirâfı mûcebince beytü’l-mâl içün mezbûr Murad Beşe yedinden beş sikke-i haseneyi aldım kabz eyledim dedikde mukırr-ı mezbûrun ikrâr-ı meşrûhunu mezbûr Murad Beşe bi’l-muvâcehe tasdîk edicek hâzihi’l-vesîka bi’t-taleb tahrîr olunup tâlibi yedine vaz‘ olundu ki müzekkir-i mâ cerâ ola. Tahrîren fî-evâil-i Cumâdelûlâ li-sene tis‘a ve elf. Şuhûdü’l-hâl: Mustafa Çelebi b. Hasan, Kaya Bey b. Ahmed, Ahmed Halîfe b. ( ) El-İmâm ve Mehmed b. Abdullah ve Mehmed b. Haydar ve Hüsrev Bey b. Abdullah ve gayruhum mine’l-hâzırîn