Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 100 Hüküm no: 121 Orijinal metin no: [49-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Dimo’nun Ahmed b. Mehmed Çavuş’a borcunu sene sonuna kadar ödeyeceğini taahhüd etmesi Havâss-ı Kostantıniyye tevâbi‘inden Hasköy’de sâkin Yani v. Dimo meclis-i şer‘de işbu hâmilü’l-kitâb fahrü’l-akrân Ahmed b. Mehmed Çavuş mahzarında takrîr-i kelâm edüp mezbûr Ahmed Çavuş’a karzdan elli sikke ve kürk bahâsından yirmi sikke cem‘an yetmiş sikke târih-i kitâbdan bir yıl va‘de ile ve mezbûr kürk bahâsını her ayda iki yüz akçesini sene tamamına varınca edâ edüp bâkī kalan elli sikke sene tamamına edâ etmek üzre lâzımü’l-edâ deynim vardır deyü ikrâr ve i‘tirâf eyledikde Zariyan oğlu Mihal ve Nikola ve Vasen ve Hoso v. Yorgi kefîl olmağın hâze’l-vesîka bi’t-taleb tahrîr olunup tâlibi yedine vaz‘ olundu ki vakt-i hâcette müzekkir-i mâ cerâ ola. Tahrîren fî-evâil-i Cumâdelûlâ li-sene tis‘a ve elf. Şuhûdü’l-hâl: Halil Halîfe b. İbrâhim, Mustafa b. Abdullah ve Mustafa b. Himmet ve Mehmed b. Mustafa ve Bayram b. Hüseyin ve Mustafa b. Abdullah ve Durak b. Hüseyin ve Mehmed b. Ahmed ve Nikola v. İstemad? ve gayruhum Sahh.