Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 100 Hüküm no: 122 Orijinal metin no: [50-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çelebi tarafından bıçakla yaralanan Mustafa’nın davasında sulh olduğu Oldur ki, havâss-ı Kostantıniyye tevâbi‘inden Hasköy’de vâki‘ el-Hâc Mehmed mahallesinde sâkin olan Mustafa b. Ahmed meclis-i şer‘de işbu hâmilü’l-kitâb Ali Çelebi b. Mehmed’in mahzarında takrîr-i kelâm edüp mezbûr Ali Çelebi bundan akdem beni bıçak ile mecrûh etdi deyü da‘vâ etmiş idim. Mezbûr Ali Çelebi meclis-i şer‘de inkâr ile cevab vericek aramızda muslihûn tavassut edüp bin akçeye sulh edüp meblağ-ı mezbûru alıp kabz edüp husûs-ı mezbûra müte‘allik da‘vâdan ferâgat ettim. Eğer bir dahi da‘vâ edersem inde’l-hükkâm mesmû‘a olunmasın deyü ikrâr ve i‘tirâf ettikde mukırr-ı mezbûrun ikrâr-ı meşrûhunu mezbûr Ali Çelebi bi’l-muvâcehe tasdîk edicek hâzihi’l-vesîka tahrîr olunup tâlibi yedine vaz‘ olundu ki, vakt-i hâcette müzekkir-i mâ cerâ ola. Tahrîren fî-evâsıt-ı Cumâdelûlâ li-sene tis‘a ve elf. Şuhûdü’l-hâl: Durak b. Hüseyin, Receb Efendi b. ( ) Ed-Dürrî, Ahmed Bey b. Abdullah ve Mehmed b. Abdullah, Hasan b. Hamza, Mehmed b. Kasım, İbrâhim b. Ahmed el-imâm ve gayruhum