Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 101 Hüküm no: 125 Orijinal metin no: [51-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Mavradi’nin mülk menzili bölünemediğinden vasî tarafından çocuklarının annesi Sofyanoz’a satılması Oldur ki, Hasköy’de bundan akdem mürd ola[n] Mavradi’nin evlâd-ı kebîr ve kebîrelerinden Todori ve Ülüfero ve Zemrade ve Saltana ve Sinio ve Gravişte’nin eytâmlarına kıbel-i şer‘den vasî nasb olan Dimitri v. Kosta meclis-i şer‘de işbu hâmilü’l-kitâb mezbûrun sagīr ve sagīrelerine kıbel-i şer‘den vasî nasb olan vâlideleri Sofyanoz mahzarında takrîr-i kelâm edüp Hasköy’de vâki‘ bir tarafı Karagöz ve bir tarafı Laskarina ve bir tarafı deryâ ve bir tarafı tarîk-ı âm ile mahdûd su kuyusu ve bir fırını ve havuzu ve kenîfi eşcâr-ı müsmire, gayr-ı müsmireyi müştemil dört bâb fevkānî ve tahtânî olan mülk menzilimizi tevzî‘i kābil olmadığı içün kıbel-i şer‘den bey‘ izni verilip bey‘ men-yezîd olundukda yüz kırk bin akçede karâr edüp vasî olan mezbûre Sofyanoz’a yüz kırk bin akçeye bey‘-ı bâtt ile bey‘ edüp meblağ-ı mezbûrun doksan beş bin akçe hisse-i şer‘iyesi hesâb olunup bize âid olan yirmi bir bin akçeyi alıp kabz edüp eytâmlarına âide olan yirmi sekiz bin akçesi zimmetinde bâkī kalmıştır deyü ikrâr ve i‘tirâf ettiklerinde mukırrûn-ı mezbûr ve mezbûrelerin ikrâr-ı meşrûhlarını mukarrun-leh mezbûre Sofyanoz bi’l-muvâcehe tasdîk edicek hâzihi’l-vesîka bi’t-taleb kaydolundu. Tahrîren fî-evâhir-i Cumâdelûlâ li-sene tis‘a ve elf. [Şuhûdü’l-hâl:] Ömer Bey b. Abdullah es-sarrâc, Ahmed Halîfe b. Cafer el-imâm, Mustafa b. Kaya, Yusuf b. Abdullah, Kasım b. Ali, Hasan b. Hamza, Kostantin v. Yulo, Yanaki v. Kostantin, Yani v. Nikola, Asteva v. Yanaki, Mihal v. Yani, Nikola v. Estemad, Mihal v. Yani ve gayruhum Tokar v. (…)