Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 102 Hüküm no: 126 Orijinal metin no: [52-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Mavradi’nin eşi ve çocukları miras davasında sulh olduğu Oldur ki, bundan akdem mürd olan Mavradi’nin zevc[es]i olan Sofyanoz meclis-i şer‘de mürd-i mezbûrun kebîr oğlu Todori ve kebîr kızları Ülüfero ve Zamrade ve Saltana ve Sinio ve bundan akdem mürde olan Gravişte’nin eytâmlarına kıbel-i şer‘den vasî nasb olan Dimitri v. Kosta mahzarında takrîr-i kelâm edüp bundan [akdem?] vâlideleri Laskarina mürd-i mezbûrun zevcesi olup mürd oldukda inde’l-ahâlî ma‘lûmetü’l-hudûd Hasköy’de olan mülk menzilde yirmi sekiz bin akçe hisse-i şer‘iyesi var idi. Mâ-beynimizde taksîm ve tevzî‘ olundu idi. Şimdi bunlar vâlidemizin mürd olan zevcim Mavradi zimmetinde otuz bin akçe miktarı esbâbını kabz etmiştir deyü da‘vâ ve nizâ‘ üzre idik. Hâlen menzil-i mezbûrda olan da‘vâdan vesâyeten ve asâleten ferâgat edüp ve mezbûrları dür[lü] esbâb da‘vâsından vesâyeten ve asâleten ferâgat ettiler dedikde birbirinin zimmetlerini ibrâ ve ıskāt ettiklerinde mâ-vaka‘a bi’t-taleb kaydolundu. Târih-i mezbûr tis‘a ve elf. [Şuhûdü’l-hâl:] Sâbıkūn