Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 104 Hüküm no: 133 Orijinal metin no: [54-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasköy’de kilise yakınlarında misâfirler için yapılmış odanın tamirine izin verilmesi Oldur ki, havâss-ı Kostantıniyye tevâbi‘inden Hasköy sâkinlerinden Toka v. Kosta ve Yani v. Mihal ve Dimitri v. Kosta ve Yanaki v. Kosta ve Samon v. Papas ve sâirleri meclis-i şer‘a gelip takrîr-i kelâm edüp karye-i mezbûrede vâki‘ olan kilise kurbünde olan müsâfirîn içün binâ olunan odanın ta‘mîri lâzım gelmişdir. Civârında mülk menzili olan Esedullah Çavuş b. Mustafa ta‘mîrine mâni‘ olur. Üzerine varılıp mâ-vaka‘a tahrîr olunup ta‘mîri içün izin taleb ederiz dediklerinde zeyl-i kitâbda esâmîsi mastûre olan Müslimîn ile üzerine varılup fi’l-vâki‘ kadîmden müsâfir içün binâ olunmuş oda olup hâlen ta‘mîri lâzım gelmiştir. İhdâs olunma değildir ve kiliseden hâricdir ve mezbûr Esedullah Çavuş’a zararı yoktur deyü haber verdiklerinde ta‘mîrine kıbel-i şer‘den izin verilüp mâ-vaka‘a bi’t-taleb tahrîr olunup tâlibi yedine vaz‘ olundu ki, vakt-i hâcette müzekkir-i mâ cerâ ola. Tahrîren fî-evâil-i Cumâdelâhire li-sene tis‘a ve elf. Şuhûdü’l-hâl: Halil b. Ali el-Hatîb, Ahmed b. Cafer el-imâm, Kurd Çelebi b. Şaban el-müderris, Mehmed b. Mehmed, Halil b. Ali, Osman b. (…) el-müezzin, Kaya b. Memi, Mustafa b. Kaya ve gayruhum