Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 105 Hüküm no: 134 Orijinal metin no: [55-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ali’nin muhallefatının satılıp bedelinin beytülmal tarafından kabz edilmesi Fî-gurre-i Cemâziyelâhir li-sene tis‘a ve elf. Oldur ki, bi’l-fi‘il Hasköy’de subaşı olan Sinan Bey b. Abdullah meclis-i şer‘de işbu hâmil-i hâze’l-kitâb Hasan b. Bilal mahzarında takrîr-i kelâm edüp bundan akdem vefât eden Ali nâm kimesnenin muhallefâtı beytü’l-mâl içün kabz olunup muhallefâtından olan permeyi mezbûr Hasan’a dokuz yüz akçeye bey‘-ı bâtt ile bey‘ edüp teslîm-i mebî‘ ve kabz-ı semen eyledim deyü ikrâr ve i‘tirâf ettikde mukırr-ı mezbûrun ikrâr-ı meşrûhunu mezbûr Hasan bi’l-muvâcehe tasdîk edicek hâzihi’l-vesîka tahrîr olunup tâlibi yedine vaz‘ olundu ki, vakt-i hâcette müzekkir-i mâ cerâ ola. Tahrîren fî-evâhir-i Cumâdelâhire li-sene tis‘a ve elf. Şuhûdü’l-hâl: İsmail Çelebi b. Ahmed, Hasan b. Abdullah ve Mustafa b. Ahmed, Kara Hoca el-imâm, Kara Hasan b. İbrâhim ve gayruhum. Muhallefât-ı merhûm Ali beytü’l-mâl içün kabz olunup, Hodhâne, meblağ 120, iki yüz elli akçe Dimo’ya verildi. Bahâ-i pereme, meblağ 900 ve kırk akçe bir def‘a dahi Osman nâm kimesneye deyne verildi. Bahâ-i kefen, meblağ 90. Cümle altı yüz otuz akçe beytü’l-mâl kabz eden Hasköy Subaşısı Sinan Bey kabz edüp kaydolundu. Târih-i mezbûr. Şuhûdü’l-hâl: Sâbıkūn 135 [55-2] Kurd Çelebi b. Hasan’ın yetimlerine intikal eden tarlanın Muzaffer b. Abdullah’a tefviz edilmesi Oldur ki, bundan akdem vefât eden merhûm Kurd Çelebi b. Hasan nâm kimesnenin eytâmlarına kıbel-i şer‘den vasî nasb olan Mehmed b. Haydar meclis-i şer‘de işbu hâmil-i hâze’l-kitâb Muzaffer b. Abdullah mahzarında takrîr-i kelâm edüp merhûm-ı mezbû[ru]n Kâğıthane cânibinde Sultan Bâyezid Vakfı’ndan üç tarafı eytâmlar tarlasına ve bir tarafı tarîk-ı âm ile mahdûd olan tarlayı vakf-ı mezbûra senesi beş akçe mukāta‘ası ile sahib-i arz ma‘rifetiyle mezbûr Muzaffer’e üç bin akçeye tefvîz edüp mukābele-i tefvîzde meblağ-ı mezbûru alıp kabz ettim deyü ikrâr ettikde mâ-vaka‘a bi’t-taleb kaydolundu. Tahrîren fî-evâil-i Cumâdelâhire li-sene tis‘a ve elf. Şuhûdü’l-hâl: Esedullah Çelebi, Kasım b. Ali, Hüsrev b. Abdullah, Ali Çelebi b. Mehmed Bey, Halil b. İbrâhim, Rıdvan b. Mustafa, Mehmed b. Mehmed ve gayruhum