Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 106 Hüküm no: 137 Orijinal metin no: [56-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed ve kardeşleri ile validesi Nefise’nin evlerini satmaları Oldur ki, Havâss-ı Kostantıniyye tevâbi‘inden Hasköy’de vâki‘ Mehmed Çelebi mahallesi sâkinlerinden Mehmed b. Mirza? ve karındaşlarından Mustafa ve Mahmud ve vâlidesi Nefise bt. Halil, meclis-i şer‘de işbu hâmilü’l-kitâb sâbıkā Diyarbakır defterdârı olan fahrü’l-emâsil ve’l-akrân Mahmud Efendi tarafından tasdîk-i âti’z-zikr[e] tarîk-ı şer‘î üzre vekâleti sâbite olan el-Hâc Mahmud b. Ahmed mahzarında takrîr-i kelâm edüp mahalle-i mezbûrede vâki‘ babamız Mirza’dan? irsle intikāl edüp harâba müşrif olan bir fevkānî evi ve ahırı ve su kuyusunu ve bağçeyi müştemil olup bir tarafı Mehmed Çelebi b. Abdülkerim ve bir tarafı Sefer b. Abdullah ve bir tarafı diğer Sefer Ağa ve bir tarafı tarîk-ı âm ile mahdûd olan mülk menzilimizi mezbûr Mahmud Efendi’ye iki bin iki yüz nakd-i râyic fi’l-vakt fıddî akçeye bey‘-ı bâtt ile bey‘ edüp teslîm-i mebî‘ ve kabz-ı semen ettik. Ba‘de’l-yevm keyfe mâ yeşâ mutasarrıf olsun deyü ikrâr ve i‘tirâf ettiklerinde mukırrûn-ı mezbûrun ikrâr-ı meşrûhunu mezbûr el-Hâc Mahmud bi’l-muvâcehe vekâleten tasdîk etmeğin tahrîr olundu. Tahrîren fî-evâsıt-ı Cumâdelâhire li-sene tis‘a ve elf. Şuhûdü’l-hâl: İbrâhim b. Ahmed el-imâm, Ahmed Halîfe b. Cafer el-imâm, Ahmed Bey b. Abdullah Usta-i Hâssa, Ba‘şâyiş b. Süleyman, Süleyman b. Abdullah ve Yakub b. Abdullah ve Mehmed b. Kasım ve Hasan b. Hamza ve gayruhum