|
Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 110 Hüküm no: 145 Orijinal metin no: [59-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Hasköy sakinlerinden Hasan’ın borcu olduğu
Hasköy sâkinlerinden Hasan b. Hamza nâm kimesne meclis-i şer‘a hazır olup işbu sahibü’s-sicil Ömer b. Abdullah er-râcil muvâcehesinde ikrâr ve i‘tirâf edüp mezbûr Ömer’e vâcibü’l-edâ deyn-i şer‘î beş yüz fıddî-i Osmânî akçe deynim vardır deyü bi’t-tav‘ i‘tirâf edüp mukırr-ı mezbûrun vech-i meşrûh üzre olan ikrârını mukarrun-leh Ömer dahi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb kayd-ı sicil olundu.
Tahrîren fî-evâsıt-ı şehr-i Recebi’l-mürecceb li-sene tis‘a ve elf.
Şuhûdü’l-hâl: Muslihiddin Halîfe el-imâm, Kerim b. Hasan, Eyyûb b. Mustafa, Ali b. Memi, Mustafa Bey es-sarrâc, Cebeci Hasan b. Abdullah, Veli Beşe er-râcil
Muhtesib Mehmed nâm kimesne mahfil-i kazâda mezbûr Hasan’ın nefsine ve hîn-i mutâlebede ihzârına târih-i kitâbdan doksan güne dek kefîl olduğu kaydolundu.
Tahrîren fî-evâsıt-ı şehr-i Recebi’l-mürecceb li-sene tis‘a ve elf.
Şuhûd[ü’l-hâl]: Kemâ sebak
|