.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 113
Hüküm no: 153
Orijinal metin no: [62-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


el-Hâc Şaban mahallesi sakinlerinden Bünyad’ın evinde şarab içenlerin yakalanması

Medîne-i Hazret-i Ebî Eyyûb Ensârî -radiye anhü Rabbühü’l-Bârî- muzâfâtından Hasköy’de bi’l-fi’l subaşı fahrü’l-akrân Mustafa Bey b. Ferhad, mahkeme-i muhkemetü’l-beyâna gelüp takrîr-i kelâm edüp karye mahallâtından el-Hâc Şaban mahallesi sâkinlerinden Bünyad nâm kimesnenin evinde İzmit sâkinlerinden Mehmed b. Mustafa ve mahalle-i mezbûre sâkinelerinden Sâliha bt. ( ) nâm hatun ile birbirine nâ-mahrem iken akd-i meclis edüp şurb-i hamr ederler. Cânib-i şer‘den üzerlerine varılup keşfolunmasın matlûbumdur dedikde zeyl-i kitâbda mastûrü’l-esâmî olan Müslimânlar ile ve hâssa bostancılardan Hasan ve Derviş nâm kimesneler ile üzerlerine varılup keşfolundukda dâr-ı mezbûrda merkūm Mehmed b. Mustafa mezkûre Sâliha ile şurb-i hamr ederlerken ahz olundukda mezkûre Sâliha, mezbûr Mehmed’in nigârı olduğun mu‘terife olmağın mâ hüve’l-vâki‘ bi’t-taleb ketb olundu.

Tahrîren fî-evâil-i Saferü’l-hayr li-sene ihdâ ve selâsîn ba‘de’l-elf.

Şuhûdü’l-hâl: Mahmud b. Kara Cevad el-müezzin, Mehmed b. Hüseyin, Ahmed Halîfe b. Abdullah el-imâm, Mehmed b. Abdullah