.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 115
Hüküm no: 159
Orijinal metin no: [63-3]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Vefat eden Mihriban’ın muhallefâtının eşi Ali ve beytülmal zâbiti arasında sulh yolu ile paylaşılması

Havâss-ı aliyye kazâsı muzâfâtından karye-i Has[köy’]de vâki‘ bi’l-fi‘il za‘îmü’l-vakt olup ve emânet-i beytü’l-mâl zâbiti olan Halil Çelebi b. İbrâhim mahfil-i kazâda bâ‘isü’l-kitâb Ali b. Abdullah mahzarında bi’t-tav‘ ikrâr ve i‘tirâf edüp karye-i merkūme mahallâtından Turşucuzâde Hüseyin Çelebi mahallesinde sâkine iken fevt olan Mihriban bt. Abdullah nâm hatunun verâseti zevci mezbûr Ali’ye ve beytü’l-mâla münhasıra oldukda muhallefâtının nısfı bi-hasebi’ş-şer‘ mezbûr Ali’ye ve nısf-ı âharı emânet-i mahkiyem hasebiyle bana âid ve râci‘ olmağla beynimizde münâza‘ât-ı kesîre ve muhâsamât-ı ekîde vâkı‘a olup es-sulhü seyyidü’l-ahkâm muktezâsınca aramıza muslihûn tavassut edüp tehâruc-ı şer‘î tarîkiyle beni dört yüz nakid akçeye sulh eylediklerinde ben dahi sulh-ı mezbûru kabûl, bedel-i sulh olan meblağ-ı mezbûr dört yüz akçeyi mesfûr Ali yedinden bi’t-tamam ve’l-kemâl ahz u kabz eyledim. Ba‘de’l-yevm bi’l-asâle ve bi’l-vekâle müteveffât-ı mezbûrenin [64] (…) esâs-ı beyt ve ism-i mâl ıtlâk olunan (…) da‘vâ ve taleb edersem lede’l-hükkâmi’l-kirâm mesmû‘a ve makbûle olmaya dedikde mukırr-ı mezbûr Halil Çelebi’nin vech-i meşrûh üzre sudûr ve zuhûr eden ikrâr ve i‘tirâfın el-mukarru lehu’l-mesfûr Ali, bi’l-muvâcehe tasdîk ve bi’l-müşâfehe tahkīk edicek mâ-vaka‘a alâ- vukū‘ihî gıbbe’t-taleb ketb olundu.

Tahrîren fî-evâsıt-ı Rebî‘i’l-âhir li-sene ihdâ ve selâsîn ve elf.

Şuhûd[ü’l-hâl]: İbrâhim Efendi el-imâm fi’l-mahalleti’l-mezbûre, Mehmed b. Haydar, Hüsrev b. Abdullah el-mütevellî, Mustafa b. Abdullah, Mehmed b. Muslihiddin