|
Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 134 Hüküm no: 196 Orijinal metin no: [87-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Ebisay’ın Şam’dan hanımı Harasbula bt. Yasef’e vermek üzere kardeşi Murdahay’a gönderdiği yemenî taşların teslim edildiği
Havâss-ı Kostantıniyye -hamâhallâhu te‘âlâ ani’l-beliyye- kazâsı muzâfâtından kasaba-i Hasköy’de sâkine Harasbula bt. Yasef nâm Yahûdî meclis-i şer‘-i hatîr-i lâzımü’t-tevkīrde işbu bâ‘isü’s-sifr Murdahay zevcim olup bundan akdem Şâm-ı şerîfde mütemekkin iken Ebisay nâm Yahûdî’nin li-ebeveyn er karındaşı olmağla otuz guruş kıymetli yemenî taşları bana teslîm etmek üzere zevcim gāib-i merkūm kardaşı mesfûr Murdahay’a irsâl etmiş iken merkūm Murdahay ketm edip teslîmden imtinâ‘ eder, suâl olunup kasr-ı yedine tenbîh olunmak matlûbumdur dedikde gıbbe’s-suâl merkūm Murdahay cevâbında fi’l-vâki‘ otuz guruş kıymetli yemenî taşları karındaşım gāib-i merkūm bana irsâl eylediği mukarrer lâkin bi-aynihî ol taşları müdde‘iyye-i merkūme Harasbula’ya teslîm eyledim deyü def‘le mukābele edicek gıbbe’l-istintâk ve akībe’l-inkâr mezbûr Murdahay’dan sıdk-ı kelâmını mübeyyine beyyine taleb olundukda yine kasaba-i merkūmede sâkin Avraham v. Mosi ve Mosi v. Yahûda nâm Yahûdiler meclis-i şer‘e hâzırân olup istişhâd olunduklarında fi’l-hakīka ol kutuyla olan otuz guruş kıymetli yemenî taşları bundan akdem mezbûr Murdahay müdde‘iyye-i merkūme Harasbula’ya bizim huzûrumuzda teslîm eyledikde ol dahi kabz edip bu husûsa müte‘allik de‘âvîden zimmetini ibrâ ve ıskāt etmişdi. Biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîli’ş-şer‘î şehâdetleri makbûle olmağın mûcebiyle merkūme Harasbula’ya bî-vech ta‘arruzdan men‘ olunup mâ-vaka‘a bi’t-taleb ketb olundu.
Fî-gurre-i Zilka‘deti’ş-şerîfe sene isneteyn ve seb‘în ve elf.
Şuhûdü’l-hâl: Mustafa Efendi hâkî, Mehmed Bey b. Ahmed, Mehmed Çavuş b. İsa, Mahmud Çelebi b. Mehmed, Mehmed Beşe b. İsa ve gayruhum mine’l-hâzırîn
|