.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 135
Hüküm no: 197
Orijinal metin no: [88-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Melek bt. Bahtiyar’ın Mardiros’dan ev kirasından alacağı olduğu

Havâss-ı Kostantıniyye -hamâhallâhu te‘âlâ ani’l-âfet ve’l-beliye- kazâsına tâbi‘ kasaba-i Hasköy’de sâkine işbu bâ‘isü’l-vesîka Melek bt. Bahtiyar nâm Ermeniye’nin sadrî kebîr oğlu ve tarafından husûs-ı câi’z-zikr da‘vâya vekîli olup bimâ-hüve nehcü’s-sübût şer‘an vekâleti sâbite olan Yakut v. Gaspar nâm Ermeni meclis-i şer‘-i hatîr-i lâzımü’t-tevkīrde Mardiros v. Sercan nâm Ermeni muvâcehesinde bi’l-vekâle üzerine takrîr-i da‘vâ edip Turşucuzâde Hüseyin Çelebi Vakfı’ndan olup yine kasaba-i merkūmede mezbûr Turşucuzâde mahallesinde vâki‘ hudûdu beynimizde ma‘lûm iki bâb fevkānî odaları ve bir mikdâr havluyu müştemil olan vakıf menzili îcâr ve mu‘accele ve beher mâh on beş akçe ecr-i müeccele ile müvekkile-i merkūme ile merkūm Mardiros’un tasarrufundan lâkin menzil-i merkūm dört sehim olmağla bir buçuk sehmi mezbûr Mardiros’un ve iki buçuk sehmin anam müvekkile-i merkūmenin tasarrufunda iken merkūm Mardiros ol dört sehmin bir sehmi dört ve buçuk sehmi iki sene tasarruf etmişdir, menzil-i mezbûrda yevmî dörder akçe ücret ile sâkin olurlar, târih-i kitâba gelince yevmî dörder akçeden beher hisseye birer akçe hesâbı üzere müddet-i mezbûrda olan cem‘an iki bin akçe ücretini vekâlet-i mahkiyem hasebiyle taleb ederim, suâl olunsun dedikde gıbbe’s-suâl merkūme Mardiros cevâbında fi’l-hakīka hâl-i kazıyye minvâl-i muharrer üzere olup zîrâ menzil-i merkūmda dört sehimden bir buçuk sehmi benim ve iki buçuk sehmi müvekkile-i merkūme tasarrufundan dört [sehmi] müddet-i merkūmda cümle menzili ben tasarruf eyledim deyü tâyi‘an mukır ve mu‘terif olmağın mâ-hüve’l-vâki‘ bi’t-taleb ketb olundu.

Fî-gurrei Şevvali’l-mükerrem min-şuhûri sene isneteyn ve seb‘în ve elf.

Şuhûdü’l-hâl: Ali Efendi b. el-Hâc Mehmed el-imâm, Ahmed b. Mehmed, Mahmud Çelebi b. Mehmed, Mehmed b. Abdullah, Dilaver Bey b. Abdullah ve gayruhum mine’l-hâzırîn