.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 136
Hüküm no: 200
Orijinal metin no: [89-3]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Cafer b. Abdullah’ın kendisini yaralayan Yusuf’u affettiği

Havâss-ı Kostantıniyye tevâbi‘inden Hasköy mahallâtından Abdüsselam mahallesi sâkinlerinden Yusuf b. Abdullah nâm kimesne mahfil-i kazâda hasm-ı şer‘îsi olan Cafer b. Abdullah mahzarında tâyi‘an ikrâr ve i‘tirâf edip mezbûr Cafer’i bıçak ile urup serhoşla bilmedim hata etmişin, dilerse eltâf-ı amîmesinden afv etsin, dilerse hakkın taleb eylesin dedikde mezbûr Cafer dahi vaktâ kim ashâb-ı ilim ve erbâb-ı fazldan “femen afâ ve aslaha ve ecruhû alellâh” ve kavlühî te‘âlâ “ve’l-kâzımîne’l-gayza ve’l-âfîne ani’n-nâs vallâhü yuhibbü’l-muhsinîn” âyet-i kerîmenin ma‘nâsını istimâ‘ edip hasbeten lillâh merkūm Yusuf’u afv edip husûs-ı mezbûra müte‘allik cemî‘sin da‘vâmdan [90] (...) [ı]skāt ettim bir dahi taleb edersem inde’l-hükkâm mesmû‘a [ve mak]bûle olmaya dedikden sonra mâ hüve’l-vâki‘ mezbûr Yusuf talebiyle ketb ü imlâ olunup yed-i tâlibe vaz‘ u def‘ olundu ki vakt-i hâcetde müzekkir-i mâ-cerâ ola.

Fî-evâili Saferü’l-muzaffer sene tis‘a ve elf.

Şuhûdü’l-hâl: Esedullah Çavuş, Muslı Çelebi b. Hasan, Halil b. İbrahim, Hüsrev b. Abdullah, Mehmed b. Ali, Mehmed b. Hüseyin, Ali Çelebi b. Memi Kapudanzâde, Ahmed Çelebi b. İbrahim Çavuş, Ali Çelebi b. Hayreddin ve gayruhum