.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 137
Hüküm no: 201
Orijinal metin no: [90-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Gülahmer bt. Abdullah ile Seyyid Hasan’ın muhâlaa ile boşandıkları

Vech-i tahrîr-i hurûf budur ki, İstanbul sâkinlerinden Gülahmer bt. Abdullah nâm Hatun mahfil-i kazâda Hasköy sâkinlerinden sâbıkā zevci olan Seyyid Hasan b. Hamza nâm kimesneyi meclis-i şer‘a ihzâr muvâcehesinde takrîr-i kelâm edip mezbûr Hasan beni boşadı idi, bir döşek ve bir kebe ve sandık ve sâir esbâbım vardır, bi-hasebi’ş-şer‘i’ş-şerîf taleb ederim dedikde mezbûr Hasan’a suâl olundukda dedi ki merkūm Gülahmer Hatun ile hul‘ olduk, bedel-i hul‘ yüz akçe verip biribirimizden birden bine ve binden bire dek zevciyete müte‘allik cemî‘ da‘vâsından ve esbâbından ferâgat eyledi dedikde mezbûr hatuna suâl olundukda inkâr ile cevâb vericek merkūm Hasan’dan yüz akçe ile hul‘ olduğuna beyyine taleb olundukda udûl-i Müslimîn’den Receb Efendi el-mülâzım ve İbrahim b. Ahmed el-imâm nâm kimesneler şehâdet-i şer‘iye eyleyip dediler ki, bizim yanımızda biribirlerinden birden bine ve binden bire dek cemî‘ da‘vâsından ferâgat eyleyip bedel-i hul‘ yüz akçe verip hul‘-ı sahîh ile hul‘ etmişdiler, Allah için şâhidiz şehâdet dahi ederiz dediklerinde şehâdetleri hayyiz-i kabûlde vâki‘ oldukda mâ-hüve’l-vâki‘ kayd-ı sicil olundu.

Tahrîren fî-târîhi’l-mezbûr.

Şuhûdü’l-hâl: Hüseyin b. Abdullah, Bali b. Şa‘ban, Kaya Bali b. Ahmed, Hamza b. Pir Ali, Yakub b. Sevindik, Mehmed b. Kasım