.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 138
Hüküm no: 203
Orijinal metin no: [91-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


İbrahim b. Memi’nin bakkal dükkânının soyulduğu, soygunu yapanlardan Mahmud’dan paranın bir kısmının alındığı

Oldur ki, Hasköy’de bi’l-fi‘il subaşı olan Sinan b. Abdullah nâm kimesne mahfil-i kazâda Südlüce’de sâkin olan İbrahim b. Memi nâm bakkalı meclis-i şer‘a ihzâr muvâcehesinde takrîr-i kelâm edip mezbûr İbrahim’in dükkânı açılmış akçesi zâyi‘ olmuş kimini bulmuş suâl olunup görülmesin taleb ederim dedikde mezbûr İbrahim’e suâl olundukda dedi ki, ağşam eve giderim idi, yatsı namazından sonra dükkânım açıldı, iki bin yüz Osmânîm ve üç sikke florim ve bir buçuk guruşum almışlar deyü cevâb vericek merkūm subaşı akçenin birazın bulmuş suâl olunsun dedikde merkūm İbrahim’e suâl olundukda hizmetkârım olan Murad nâm oğlanın elinden Mahmud nâm kimesne dükkânın anahtarını almış imiş, mezbûr Mahmud’a ıztırâb verdikde Mahmud nâm kimesneden bin akçe ve üç sikke flori ve bir guruşu aldım, mâ-bâkīsini ortağım olan Mehmed ile hesâb edelim de onu dahi veririn dedi deyü ikrâr ve i‘tirâf eyleyip ikrâr [ve] i‘tirâfını mezbûr subaşı talebiyle kayd-ı sicil olundu.

Tahrîren fî-târîhi’l-mezbûr.

Şuhûdü’l-hâl: Hasan Bey b. Abdullah, Mehmed b. İlyas, Mehmed b. Abdülkerim, Mustafa b. Mahmud, Receb b. Ali, Şa‘ban [b.] Emrullah, İbrahim b. Mehmed, Cafer b. Abdullah