.:: İstanbul Kadı Sicilleri ::. 

Hasköy Mahkemesi 3 Numaralı Sicil (H. 1023-1081 / M. 1615-1670)
cilt: 52, sayfa: 139
Hüküm no: 206
Orijinal metin no: [92-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Niko v. İstemad’ın istiğlal yoluyla vakıf mütevellisi Ali Efendi b. Hüseyin’den aldığı borcu vakfa geri ödediği

(...) Vakfı’nın bi’l-fi‘il mütevellîsi olan Ali Efendi b. Hüseyin nâm kimesne mahfil-i kazâda hazret-i Ebî Eyyûb el-Ensârî -aleyhi rahmeti’l-bârî- kazâsına tâbi‘ Hasköy’de sâkin işbu râfi‘u’l-kitâb Niko v. İstemad nâm zimmî mahzarında takrîr-i merâm kılıp vakf-ı mezbûr malından bin iki Receb’i gurresinde istiğlâl tarîki üzere alınmış yirmi sekiz bin akçe olup hâlen târih-i kitâb gurresine gelince altı buçuk yıl mürûr edip asl-ı mâl olan yirmi sekiz bin akçeyi ve târih-i kitâb gurresine gelince olan altı buçuk yıllık murâbahayı merkūm Niko’nun yedinden bi’t-tamam ve’l-kemâl alıp kabz ettim, zimmetinde asl-ı mâldan ve murâbahadan bir akçe ve bir habbe kalmadı, ba‘de’l-yevm mezbûr Niko’dan vakf-ı mezbûr malına müte‘allik da‘vâ edip hak taleb edersem inde’l-hükkâmi’l-kirâm mesmû‘a ve makbûle olmaya deyü ikrâr ve i‘tirâf ettikde mukırr-ı merkūmun kelâm-ı meşrûhunu mukarrun lehu’l-mezbûr Niko dahi vicâhen ve şifâhen tasdîk ettikden sonra mâ-hüve’l-vâki‘ bi’t-taleb kaydolundu.

Tahrîren fî-evâsıtı şehri Saferü’l-muzaffer sene tis‘a ve elf.

Şuhûdü’l-hâl: Mehmed Bey b. Abdullah bevvâb-ı sultânî, Mustafa b. Hasan el-imâm, Fahrü’l-akrân Esedullah Çavuş b. Mustafa, Mustafa Beşe b. Abdullah er-râcil, Kaya Bey b. Ahmed, Hüsrev Bey el-mütevellî, Rıdvan Bey b. Abdullah, Halil b. İbrahim el-müezzin, Receb Efendi b. Sefer el-müderris, Seyyid Hasan b. Seyyid Hamza, Hayreddin b. Mahmud el-hatîb, Mahmud b. Hanif