|
Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 141 Hüküm no: 210 Orijinal metin no: [94-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Ali Çelebi’nin evini Ahmed Çavuş’a sattığı
(...) Eyyûb el-Ensârî (...) kazâsına tâbi‘ Hasköy mahallâtından merhûm Turşucuzâde Hüseyin mahallesinde sâkin olan Ali Çelebi b. Çerkez Memi nâm kimesne mahfil-i şer‘-i şerîfe hazır olup işbu hâmil-i hâze’l-kitâb dergâh-ı âlî çavuşlarından fahrü’l-emâcid ve’l-ekârim Ahmed Çavuş b. Mehmed mahzarında ikrâr ve i‘tirâf edip mahalle-i mezbûrda vâki‘ bir tarafı bâyi‘-i mezbûr mülküne ve bir tarafı müşteri mülküne ve iki tarafı tarîk-i âm ile mahdûd olan karındaşım Osman’dan irs-i şer‘le intikāl eden mezarlık mülk menzilimi, içinde su kuyusuyla ve taş seddi ile ve eşcâr-ı müsmire ve gayri müsmiresiyle on sekiz bin yedi yüz nakd-i râyic fi’l-vakt akçeye bey‘-ı bâtt-ı sahîh-i şer‘î ile bey‘ edip ol dahi vech-i meşrûh üzere iştirâ edip kabz-ı semen ve teslîm-i mebî‘ edip mukırr-ı merkūmun ikrâr-ı meşrûhunu mukarrun lehu’l-mezbûr Ahmed Çavuş bi’l-muvâcehe tasdîk ve tahkīk edip mâ-hüve’l-vâki‘ bi’t-taleb ketb ü imlâ olundu ki vakt-i hâcetde müzekkir-i mâ-cerâ.
Tahrîren fî-evâsıtı Saferü’l-muzaffer sene tis‘a ve elf min-hicreti’n-nebeviye.
Şuhûdü’l-hâl: Esedullah Çavuş b. Mustafa, Mehmed b. Mehmed el-hatîb, Mustafa b. Hasan el-imâm, Muslı Çelebi b. Hasan sarrâc, İsmail Çelebi b. Ahmed bevvâb-ı sultânî, Kaya b. Ahmed, Hüseyin Bey b. Arslan sarrâc, Ali Çelebi b. Hayreddin, Hüsrev b. Abdullah el-mütevellî, Mehmed b. Haydar el-müezzin, Osman b. Ömer el-müezzin, Mustafa Çelebi b. Şa‘ban, Mehmed b. Mehmed, Kasım b. Ali el-müezzin, Şa‘ban b. İskender, Mustafa b. Abdullah er-râcil, Durak b. Hüseyin ve gayruhum
|